नेपाल-भारत ऊर्जा सचिवस्तरीय बैठक शुरू

काठमाडौंः नेपाल र भारतबीचको विद्युत् व्यापार सम्झौता (पीटीए) कार्यान्वयनका लागि हुँदै आएको ऊर्जा सचिवस्तरीय बैठक बिहीवारदेखि शुरू भएको छ । आठौं ऊर्जा सचिवस्तरीय बैठक बिहीवारदेखि भर्चुअल माध्यमबाट शुरू भएको हो ।

शुक्रवारसम्म हुने उक्त बैठकमा बिहीवार जोइन्ट वर्किङ ग्रूप अर्थात् सहसचिवस्तरीय वार्ता भएको छ । शुक्रवार भने जोइन्ट स्टेरिङ ग्रूप अर्थात् सचिवस्तरीय वार्ता हुने ऊर्जा मन्त्रालयले बताएको छ ।

बैठकको पहिलो दिन नेपालका तर्फबाट ऊर्जा सहसचिव प्रवीणराज अर्यालले नेतृत्व गरेका थिए । यस्तै, नेपाल विद्युत् प्राधिकरण, विद्युत् विकास विभाग र लगानी बोर्डका प्रतिनिधिको उपस्थिति थियो । भारतको तर्फबाट पनि ऊर्जा सहसविचलगायत प्रतिनिधि सहभागी थिए ।

अहिले कोरोना भाइरसको असरका कारण वार्ताको लागि विशेष नयाँ एजेन्डा बनाइएको छैन । अहिलको वार्तामा पुराना एजेन्डा र पहिलाका निर्णयको प्रगति प्रतिवेदनबारे छलफल हुनेछ ।  नेपाल–भारतबीच २०७१ कात्तिक ४ गते विद्युत् व्यापार सम्झौता भएको थियो । पीटीए कार्यान्वयनका लागि नेपाल– भारतको सचिवस्तरीय बैठक हरेक वर्ष हुँदै आएको छ । पीटीएपछि दुवै देशले आलोपालो बैठक राख्दै आएका छन् । यसअघि २०१९ अक्टोबर (२०७६ असोज २६ र २७) मा भारतको बैङ्लोरमा यस्तो बैठक सम्पन्न भएको थियो । यसपटकको बैठक भने नेपालको नेतृत्वमा शुरू गरिएको हो ।

गतवर्षको बैठकमा न्यू बुटवल–न्यू गोरखपुर दोस्रो अन्तरदेशीय प्रसारण लाइन (४०० केभी) को निर्माण दुवै देशले बराबर लगानी गरेर बनाउने निर्णय भएको थियो । बैङ्लोर बैठकले दुई देशबीच थप दुई अन्तरदेशीय प्रसारण लाइन इनरुवा–पूर्णिया र लम्की–बरेलीको विस्तृत परियोजना प्रतिवेदन पनि स्वीकृत गरेको थियो । उक्त दुई प्रसारण लाइनको लगानी ढाँचा भने यसै बैठकमा तय गरिने बताइएको छ ।

यो बैठकमा अन्तरदेशीय प्रसारण लाइनले नै प्राथमिकता पाउने बताइएको छ । यस्तै, इनर्जी बैंकिङ, सञ्चालित प्रसारण लाइनको स्तरोन्नति र सुनौली–गोरखपुर दोस्रो अन्तरदेशीय प्रसारणको प्रस्ताव पनि बैठकमा पेश गरिनेछ । अभियान