गण्डकी प्रदेशसभाको बैठक अनिश्चितकालसम्मका स्थगित

काठमाण्डौंः गण्डकी प्रदेशसभाको बैठक अनिश्चितकालसम्मका स्थगित भएको छ।

मुख्यमन्त्री पृथ्वीसुब्बा गुरुङविरुद्ध दर्ता भएको अविश्वासको प्रस्तावमाथि मतदान हुने कार्यसूची रहेपनि जनमोर्चाका सांसद खिमविक्रम शाही र स्वतन्त्र सांसद दिपक मनाङ्गे सम्पर्कविहीन भएपछि सभामुख नेत्रप्रसाद अधिकारीले बैठक स्थगित गरेका हुन्।

नेपाली कांग्रेस, नेकपा माओवादी केन्द्र र राष्ट्रिय जनमोर्चा मिलेर दर्ता गरेको अविश्वास प्रस्तावमाथि निर्णय गर्नुअघि सांसद शाही सम्पर्कबिहिन भएपछी बैठक नै अनिश्चित भएको हो ।

जनमोर्चाका संसदीय दलकी नेता पियारी थापा लगायतले शाहीलाई खोजेपनि नभेट्टाएपछि सभामुख नेत्रप्रसाद अधिकारीले सूचना टाँस गरेर बैठक स्थगित गरिदिएका हुन्।

६० सदस्यीय प्रदेशसभामा कांग्रेसका १५ र माओवादीका ११ जना, जनमोर्चाका ३ जना, जसपाका २ समेत गर्दा ३१ हुने अवस्था थियो। तर अविश्वास प्रस्तावमा हस्ताक्षर गरेका शाही मोबाइल अफ गरेर हिँडेपछि प्रदेशसभामा खैलाबैला मच्चिएको छ।

एमालेले अविश्वास प्रस्ताव फेल हुने भएपछि कांग्रेस माओवादीले सभामुखलाई प्रयोग गरेर बैठक नै अवरुद्ध पारेको आरोप लगाएको छ। सभामुख अधिकारी माओवादीका सांसद हुन्।