विश्वकप छनोटः नेपाल र जोर्डनबीच आज प्रतिस्पर्धा हुँदैं

काठमाण्डौंः विश्वकप फुटबलको छनोट तथा सन् २०२३ को एसियन कप फुटबलको दोस्रो चरणको छनोट खेलमा नेपालले आज जोर्डनसँग प्रतिस्पर्धा गर्दैछ ।

कुवेत सिटीस्थित जाबेर अल अहमद अन्तर्राष्ट्रिय स्टेडियममा हुने खेल नेपाली समयानुसार राति पौने १० बजे सुरु हुनेछ । जोर्डनविरुद्ध मैदान उत्रदा नेपाल स्पष्ट अंक जोड्ने लक्ष्यमा हुनेछ ।

सोही मैदानमामा चाईनिज ताईपेईलाई २-० ले हराएको नेपाल उच्च मनोबलका साथ बलियो टोलीविरुद्ध मैदान उत्रनेछ । नेपाल ६ खेलमा ६ अंक जोडेर चौंथो स्थानमा छ भने एक खेल कम खेलेको जोर्डन १० अंकमा समुहको तेस्रो स्थानमा छ ।

नेपालले जोर्डनविरुद्ध हालसम्म तीन पटक खेलेको छ । जोर्डनविरुद्ध दुई खेल गुमाएको नेपालले एक खेलमा भने बराबरीमा रोकेको छ । विश्वकप छनोटको खेलको पहिलो लेगमा नेपाल जोर्डनसँग उसैको भूमिमा ३-० ले पराजित भएको थियो ।