असार २४, २०८२ मंगलबार
July 8, 2025
न्युज डेस्क
२०७६ पुष २४, बिहिबार
काठमाडौं । प्रधानमन्त्री बन्न नपाउने भएपछि सत्तारुढ नेपाल कम्युनिस्ट पार्टी (नेकपा)का बामदेव गौतमले राष्ट्रियसभा सदस्यको उम्मेवार बन्न अस्वीकार गरेका छन् । तर राष्ट्रियसभा सदस्यले पनि प्रधानमन्त्री बन्न पाउने गरी संविधान संशोधन गर्ने मुद्दाले भने नेकपाभित्र बहस सुरु गरेको छ ।
बुधबार यही मुद्दामा भैंसेपाटीस्थित गौतमकै निवासमा नेकपा नेताहरुबीच छलफल भएको छ । स्रोतकाअनुसार यो छलफलका लागि गौतमसँगै वरिष्ठ नेता माधवकुमार नेपालले पहल गरेका थिए । गौतमले भेटेर आफ्नो मुद्दामा सहमत गराएपछि नेता नेपालले नै अरु नेताहरुलाई छलफलका लागि भैंसेपाटी बोलाएका थिए ।
छलफलमा गौतम र नेपालसँगै अध्यक्ष पुष्पकमल दाहाल (प्रचण्ड), प्रवक्ता नारायणकाजी श्रेष्ठ (प्रकाश)लगायत सहभागी भएका थिए ।
नेताहरुले राष्ट्रियसभा सदस्य पनि प्रधानमन्त्री बन्नसक्ने व्यवस्था गर्नुपर्छ भन्नेमा प्रधानमन्त्री केपी शर्मा ओली पनि नीतिगत रुपमा सहमत भएको बताएका छन् । ‘केपी शर्मा ओलीले प्रधानमन्त्री छाड्नेरनछाड्ने भोलिको विषय हो, तर राष्ट्रियसभाका सदस्य पनि प्रधानमन्त्री बन्न पाउनुपर्छ भन्नु नीतिगत रुपमा सही छ भनेर प्रचण्डसँगै नेता नेपाल र गौतमले भन्नुभयो’, एक नेता भन्छन् ।
यसमा प्रधानमन्त्री एवं पार्टी अध्यक्ष ओली पनि नीतिगत रुपमा सहमत भएकाले संविधान संशोधनका लागि उनैसँग थप कुरा गर्ने नेताहरुबीच सहमति भएको छ ।
गौतमले नै बिगारे
तर बैठकमा नेताहरुले नीतिगत रुपमा सही मुद्दा भए पनि नेता गौतमले नै विगारेको भन्दै आक्रोशसमेत पोखेका छन् । पार्टीले राष्ट्रियसभा सदस्यको उम्मेदवार बन्न प्रस्ताव गर्दा गौतमले आफू प्रधानमन्त्री हुन सांसदमा जान चाहेको तर संविधानले राष्ट्रियसभा सदस्यलाई सरकारको नेतृत्व गर्न रोक लगाएको भन्दै अस्वीकार गरेका थिए ।
अब राष्ट्रियसभा सदस्य पनि प्रधानमन्त्री बन्न सक्ने व्यवस्था गर्दा गौतमकै लागि संविधान संशोधन गरेको सन्देश जाने भन्दै नेताहरुले असन्तुष्टि जनाएका छन् ।
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया