फागुन १ गतेदेखि काठमाडौं उपत्यकाका विद्यालयहरू खुल्ने

काठमाडौंः आगामी फागुन १ गतेदेखि काठमाडौं उपत्यकाका विद्यालयहरू खुल्ने भएका छन् । कोभिड–१९ संकट व्यवस्थापन केन्द्र (सीसीएमसीसी) को सिफारिसमा उपत्यकाका काठमाडौं, भक्तपुर र ललितपुर तीनवटै जिल्ला प्रशासन कार्यालयले हिजो आइतबार साँझ यस्तो निर्णय गरेको हो ।

त्यसै गरी जिल्ला प्रशासन कार्यालयले आइतबार राति १२ बजेदेखि नै लागु हुने गरी सवारीसाधन सञ्चालनमा लगाइएको जोरबिजोर प्रणाली पनि हटाएको जनाएको छ । जिल्ला प्रशासन कार्यालयले जारी गरेको १४ बुँदे आदेशमा कोभिड–१९ विरुद्धको खोपको दुवै मात्रा लगाइसकेका १२ वर्षमाथि उमेर समूहका विद्यार्थीका हकमा मात्र नियमित रूपमा कक्षा सञ्चालन गर्ने र १२ वर्ष पूरा नभएका विद्यार्थीको हकमा भने आलोपालो दिनमा कक्षा सञ्चालन गर्ने व्यवस्था मिलाउन आदेश दिइएको छ । त्यसै गरी सबै किसिमका परीक्षाहरू स्वास्थ्य मापदण्डको पूर्ण पालना गरी, गराई जेड आकारमा सिट व्यवस्थापन गरी २०७८ फागुन १ गतेदेखि सञ्चालन गर्न सकिने पनि आदेशमा उल्लेख छ ।

त्यसै गरी जिल्ला प्रशासन कार्यालयले पार्टी प्यालेस सञ्चालन गर्दा कुल क्षमताको ५० प्रतिशत वा बढीमा एक सय जना नबढ्ने गरी सञ्चालन गर्नुपर्ने, खेलकुद कार्यक्रम सञ्चालन गर्दा एकपटकमा कुल क्षमताको ५० प्रतिशत मात्र उपस्थित रहने गरी गतिविधि सञ्चालन गर्नुपर्ने आदेश पनि जारी गरेको छ ।

यसअघि आइतबार नै बसेको सीसीएमसीसीको बैठकले फागुन १ गतेबाट लागु हुने गरी विद्यालय खोल्न गृह र शिक्षा, विज्ञान तथा प्रविधि मन्त्रालयलाई सिफारिस गरेको थियो । सीसीएमसीसीले विश्वविद्यालय, विद्यालय, ट्युसन सेन्टर, तालिम वा अन्य शैक्षिक क्रियाकलापसमेत सञ्चालन गर्न विभिन्न मन्त्रालयलाई ८ बुँदे सिफारिस गरेको गरेको थियो ।