सरकारले हुबेई प्रान्तका सबै नेपालीको उद्धार गर्ने, फर्कन चाहनेले फारम भर्नुपर्ने

काठमाडौँ । नेपाल सरकारले चीनको हुबेई प्रान्तमा रहेका नेपालीहरुको उद्धार गर्ने भएको छ।

हुबेइको बुहानबाट कोरोना भाइरसको संक्रमण सुरु भएको हो। सो क्षेत्र अहिले पनि कोरोनाको सबैभन्दा बढी प्रकोप भएको क्षेत्र मानिन्छ।

बेइजिङमा रहेको नेपाली राजदूतावासले शनिबार एक विज्ञप्ति प्रकाशित गर्दै नेपाल फर्कन चाहनेहरुलाई फारम भर्न आग्रह गरेको छ। हुबेईमा रहेका सबै नेपाली नागरिकलाई विच्याटमार्फत सूचना दिइसकेको दूतावासले जनाएको छ।

दूतावासले नेपला फर्कन चाहनेहरुका लागि आफ्नो वेभसाइटमा एउटा फारम राखिएको र फर्कन चाहनेहरुले अनिवार्य रुपमा सो फारम भर्नुपर्ने जनाएको छ। फारम भरेर फेब्रुअरी २ तारिख (आइतबार बिहान) स्थानीय समयअनुसार ९ बजेभन्दा अगाडि पठाइसक्नुपर्ने छ।

नाबालिग बाहेक प्रत्येक पासपोर्टवालाले भिन्दाभिन्दै फारम भर्नुपर्ने र फारम तोकिएको समयमा सम्बनिधत स्थानमा आइपुगिसक्नुपर्ने दूतावासले जनाएको छ। नाबालिगकको हकमा अभिभावकले फारम भर्नुपर्ने छ। थप जानकारीका लागि दूतावासले १५७० १२८५७ ६३ नम्बरमा मा सम्पर्क गर्न आग्रह गरेको छ।

विश्वका अन्य मूलुकका नागरिकहरुलाई सम्बन्धित देशले फर्काउन थालेपछि नेपालले पनि आफ्ना नागरिक फर्काउने अभियान सुरु गरेको हो। शुक्रबार राजधानीमा आयोजित एक कार्यक्रममा नेपाल सरकारका संस्कृति, पर्यटन तथा नागरिक उड्डयनमनत्री योगेश भट्टराईले नेपाली नागरिकको सुरक्षाका लागि चीन सरकारसँग कुरा भइरहेको जनाउँदै ढुक्क हुन आग्रह गरेका थिए। सरकारले नेपाली विद्यार्थी र त्यहाँ रहेका अन्य आफ्ना नागरिहहरु फर्काउनका लागि दुई वटा विमान तयारी अवस्थामा राखेको उनको भनाइ थियो।