मधेस प्रदेशको नीति तथा कार्यक्रम जेठ २२ गते प्रस्तुत हुने

काठमाण्डौंः  मधेस प्रदेश सरकारको नीति तथा कार्यक्रम जेठ २२ गते प्रस्तुत हुने भएको छ ।

प्रदेश सरकारको तर्फबाट प्रदेशसभा सचिवालयमा आज पठाएको पत्र अनुसार २२ गते साँझ ४ बजे मधेस प्रदेशका प्रमुख हरिशंकर मिश्रले प्रदेशसभामा सरकारको नीति तथा कार्यक्रम प्रस्तुत गर्नु हुनेछ कार्यक्रम रहेको उल्लेख छ ।

मधेस प्रदेश सरकारको अहिलेको कार्यकालको अन्तिम नीति तथा कार्यक्रम एवं बजेट रहेको छ ।

नीति तथा कार्यक्रममा कृषि, सिँचाइ, स्वास्थ्य तथा पूर्वाधारको निर्माणलाई विशेष प्राथमिकतामा राखिएको प्रदेश सरकारको अर्थ मन्त्रालयले जानकारी दिएको छ ।

यसैगरी, प्रदेश सरकारले आर्थिक वर्ष २०७९/०८० को बजेट असार १ गते प्रस्तुत गर्ने कार्यक्रम रहेको छ ।

प्रदेश सरकारले असार १ गते नै बजेट पेश गर्नुपर्ने संवैधानिक व्यवस्था नै रहेको छ ।  यसैबीच, प्रदेश प्रदेशसभाको नवौँ अधिवेशन आजबाट सुरु भएको छ ।

नवौँ अधिवेशनमा शुभकामना दिँदै विभिन्न दलका नेताहरूले प्रदेश सरकारले अगामी आर्थिक वर्षका लागि ल्याउने नीति तथा कार्यक्रम एवम् बजेट यथार्थ परक हुनुपर्ने आवश्यकतामा जोड दिनुभएको छ ।

उहाँहरूले विगतमा प्रदेश सरकारले जनतालाई सरकार भएको अनुभूति गराउन नसकेका कारणले प्रदेश सरकारप्रति नकारात्मक धारणाको विकास भएको बताउँदै बाँकी रहेको ६ महिनाको कार्यकालमा राम्रो कामकाज गरेर देखाउनका लागि आग्रह गर्नुभएको थियो ।

बैठकमा मधेस प्रदेशका मुख्यमन्त्री लालबाबु राउतले प्रदेश सरकारले जुन गतिमा कामकाज गर्नुपर्दथ्यो त्यो अनुसार नगरेको स्वीकार गर्दै तर धेरै विषयमा प्रदेशको पहिचान स्थापित गर्न तथा सङ्घीयतालाई बलियो बनाउने काम गरेको बताउनुभयो । बैठकमा विभिन्न दलका नेताहरूले शुभकामना दिनुभएको थियो ।

बैठकमा प्रदेशसभाका सदस्य एवं संविधान सभा सदस्य, मधेस सरकारको पूर्व भौतिक पूर्वाधार विकास राज्यमन्त्री डा. डिम्पल झाको निधनमा शोक प्रस्ताव पारित गरेको छ । अर्को बैठक जेठ २२ गते साँझ ४ः०० बजे बस्ने गरी स्थगित भएको छ ।