आमा बितेको ६ दिनपछि नेपाल छिर्न पाए बासुदेव

धनगढी । लकडाउनका कारण आमाको मृत्यु भएर पनि भारतमै (नेपाल भारत सीमा नजिक) क्वारेन्टाइनमा बस्न बाध्य क्रिया पुत्रीलाई आज दार्चुला ल्याईएको छ । उनी आमाको मृत्युको ६ दिन पछि घर फर्केका हुन् ।

दार्चुलाको शैल्यशिखर नगरपालिका वडा नम्बर १ का ३४ वर्षीय बासुदेव भट्टलाई आइतबार दार्चुलाको दत्तु स्थित झोलुङ्गे पुलको ढोका खोली नेपाल प्रवेश गराईएको दार्चुलाका प्रमुख जिल्ला अधिकारी यदुनाथ पौडेलले बताएका छन ।

स्थानीय प्रशासन र भारतीय सुरक्षा अधिकारीको समन्वयमा दत्तु स्थित झोलुंगे पुलमा लगाएको ताला खोली उनलाई नेपाल प्रवेश गर्न दिईएको हो । भारतको धार्चुलामा लकडाउनमा फसेका उनले आमाको मृत्युको खवर पाएपनि दागवत्ती दिन पाएनन ।

उनलाई दार्चुला प्रवेश गराउन भारतीय सुरक्षाअधिकार, नेपालको सशस्त्र प्रहरी प्रहरी, प्रहरी र स्थानीय प्रशासनका प्रतिनिधि पुलमा पुगेका थिए । भारतीय सुरक्षाअधिकारीले क्रियापुत्री भट्टलाई नेपाली समकक्षीलाई हस्तान्तरण गरेका हुन ।

आमाको मृत्युमा दागवत्ती दिन समेत झोलुंगे पुल नखोलेको भन्दै सरकार र स्थानीय प्रशासनको सामाजिक संजाल देखि मिडियामा चर्को आलोचना भएको थियो ।