विश्वकपमा छनोट भएको नेपाली यू–१९ टोली स्वदेश फिर्ता

काठमाडौंः विश्वकपमा छनोट भएको नेपाली यू-१९ राष्ट्रिय क्रिकेट टोली स्वदेश फर्किएको छ।

यूएईमा भएको विश्वकप छनोट खेलेर सन् २०२४ मा श्रीलंकामा हुने विश्वकप खेल्ने सुनिश्चित गरी टोली स्वदेश फर्किएको हो। नेपाली टोली आज साँझ त्रिभुवन अन्तर्राष्ट्रिय विमानस्थलमा ओर्लिएको हो।

आईसीसी यू–१९ विश्वकप एशिया छनोटको बिहीबार सम्पन्न खेलमा यूएईमाथि सात रनको रोमाञ्चक जित निकाल्दै नेपाल विश्वकपका लागि छनोट भएको थियो। जितसँगै नेपालले सन् २०२४ मा श्रीलंकामा हुने विश्वकप खेल्ने पक्का भएको हो।

नेपाल आएपछि सञ्चारकर्मीसँग कुरा गर्दै प्रशिक्षक जगत टमाटाले नेपालको फिल्डिङ र बलिङका कारण विश्वकपमा छनोट भएको बताउनुभयो। उहाँले सबै खेलाडीले मिहेनत गरेर खेल्दा जित हात पारेको र फाइनल खेलमा यूएईसँगका अन्तिम तीन विकेट जादुमय भएको बताउनुभयो। उहाँले विश्वकप २०२४ मा हुने भएकाले अब विश्वकपका लागि धेरै समय बाँकी रहेकाले राम्रो नतिजा निकाल्ने गरी खेल्ने बताउनुभयो।

त्यस्तै यू–१९ टोलीका कप्तान देव खनालले सबै खेलाडीको मिहेनतले विश्वकपमा छनोट भएको बताउनुभयो। उहाँले टुर्नामेण्टमा जाँदा धेरै चुनौती भए पनि अब आउने दिनमा आफूलाई झनै प्रमाणित गरेर जाने चुनौती रहेको बताउनुभयो। उहाँले विश्वकपमा छनोट हुनु आफ्ना लागि एउटा सपना जस्तै भएको बताउनुभयो।

त्यस्तै बलर दीपेश कँडेलले ह्याट्रिक विकेट भन्दा पनि आफ्नो टिमले जितेकोमा खुशी लागेको बताउनुभयो। उहाँले आफू अन्तिम ओभर बलिङ गर्न आउँदा आफ्नो जीवको फस्र्ट एण्ड लास्ट ओभर सोचेर बलिङ गरेको बताउनुभयो।

नेपाल सन् २०१६ पछि पहिलोपटक विश्वकपका लागि छनोट भएको हो। यसअघि नेपालले सन् २०००, २००२, २००४, २००६, २००८, २०१२ र २०१६ को यू–१९ विश्वकप खेलेको थियो।