स्थानीय तहले आफ्नो जिम्मेवारीभित्र पर्ने काम गर्दिनँ भन्न मिल्दैन  : हरिप्रभा खड्गी (अन्तवार्ता)

संघीय सरकार र काठमाडौं महानगरबीचको तनाबलाई कसरी हेर्नुभएको छ ? 

यसरी निहुँ खोज्न मिल्दैन । सरोकारवाला पक्षसित सरसल्लाह गरेर अघि बढ्नुपर्छ । वर्तमान महानगर प्रमुखले किन यस्तो बाटो रोज्नुभयो, बुझ्न सकिरहेकी छैन । उहाँको यस्तो रबैयाले स्थानीय सरकारमाथि नै प्रश्न उठ्न सक्छ । यस विषयमा उहाँको गुनासो के हो, त्यसबारे छलफल गरेर अघि बढ्न सकिन्छ । हामी पूर्वजनप्रतिनिधि पनि यसमा सहयोग गर्न तयार छौँ । तर, महानगरको नेतृत्व त्यसका लागि तयार देखिँदैन ।

स्थानीय सरकारले यसरी आफ्नो जिम्मेवारीमा रहेको काम गर्दिनँ भन्न मिल्छ कि मिल्दैन ?

पटक्कै मिल्दैन । स्थानीय तहले काम गर्ने हो । संघ र प्रदेशले नीति, नियम बनाउने हो । त्यसैले स्थानीय तहले आफ्नो जिम्मेवारीभित्र पर्ने काम गर्दिनँ भन्न मिल्दैन । सायद पाको र खारिएको राजनीतिक नेतृत्व नहुनुको परिणाम पनि हो कि अहिलेको द्वन्द्व ? पक्कै पनि हामी सबैले महानगरको नेतृत्वलाई साथ दिनुपर्छ । यसका लागि हामीले पार्टीमा छलफल पनि गरेका छौँ । तर, त्यसका लागि माहोल त महानगर नेतृत्वले नै बनाउनुपर्छ ।

यो तनाब अन्त्य गर्ने विधि के हुन सक्छ ? 

महानगर नेतृत्वको समस्या के हो, बुझ्न सकिएको छैन । संघीय सरकारले सहयोग गरेन भने उसले प्रदेश सरकारलाई पनि गुहार्न सक्थ्यो । हामी पनि उसलाई सहयोग गर्न तयार छौँ । त्यसैले, महानगर नेतृत्वले सबैसँग समन्वय गरेर अघि बढ्नुपर्छ । नयाँपत्रिका