सचिवमा कोरोना देखिएपछी रक्षामन्त्री राजनाथ सिंह डराएर मन्त्रालय गएनन्

काठमाण्डाैंः भारतीय रक्षा सचिव कोरोना संक्रमित भएको पुष्टि भएसँगै भारतको रक्षा मन्त्रालयमा खैलाबैला मच्चिएको छ । कर्मचारीतन्त्रमा सबैभन्दा उच्च अधिकारीमध्ये एक मानिने रक्षा सचिव अजय कुमारको कोरोना रिपोर्ट पोजिटिभ आएको हो ।

रक्षामन्त्री राजनाथ सिंहले लिपुलेक पासको उद्घाटन गरेसँगै नेपालसँग चर्किएको सीमा विवाद र चीनसँग भारतीय सेनाको संघर्ष बढिरहेका बेला भारतीय सेनाको सर्वोच्च प्रशासनिक निकायमा कार्यालयको काम नै प्रभावित हुन पुगेको हो ।

रक्षा सचिव अजय कुमार संक्रमित भएको पुष्टि भएसँगै रायसेना हिल कम्प्लेक्सको साउथ ब्लकमा अधिकांश काम प्रभावित भएका छन् । सचिवलाई कोरोना संक्रमण देखिएपछि रक्षामन्त्री राजनाथ सिंहसहित शीर्ष सैन्य र सिभिल अधिकारहिरु बुधबारका दिन मन्त्रालय गएका थिएनन् । भारतीय सञ्चारमाध्यम  इकोनोमिक टाइम्सका अनुसार संक्रमित रक्षा सचिवको सम्पर्कमा आएका ३० जना कर्मचारी क्वारेन्टाइनमा राखिएका छन् ।

रक्षा सचिवमा कोरोना देखिएपछि उनको कन्ट्याक्ट ट्रेसिङ शुरु भएको छ भने साउथ ब्लकलाई सेनिटाइज गरिएको छ । रक्षा सचिव हालैमात्रै रक्षा मन्त्रीका सबै भिडियो बैठकमा सहभागी भएका थिए ।

उनको कार्यालय साउथ ब्लकको पहिलो तलामा मन्त्रीको कक्षसँगै रहको छ । यही तलामा सेना र नेभी प्रमुखका कार्यालय पनि छन् । समाचार अनुसार, विगत केही दिनय यता ३० जना मानिस उनको सम्पर्कमा आएका थिए । यी सबैलाई होम क्वारेन्टाइनमा रहन भनिएको छ ।