यसरी पनि गर्न सकिन्छ कोरोना संक्रमितको उपचार

एजेन्सी । अखिल भारतीय आयुर्विज्ञान संस्थान (एम्स) ले रेडियशन थेरापीद्वारा कोरोना संक्रमित विरामीहरुमा न्युमोनियाको असर कम गर्न सकिने बताएको छ ।

हालै गरिएको एक अनुशन्धानबाट अन्य कुनै औषधिको प्रयोग बिना रेडियसन थेरापीबाट उपचार गर्न सकिने खुलासा भएको हो । अनुशन्धानकर्ताहरुका अनुसार यो प्रविधिबाट कोरोना संक्रमित विरामीको उपचारमा थप सहयोग मिल्नेछ ।

एम्सको रेडिएशन अन्कोलोजी डिपार्टमेन्टका प्रमुख तथा यो अनुशन्धान परियोजनाका प्रमुख अनुशन्धानकर्ता डाक्टर डिएन शर्माले बताए, ‘गत शनिबार अक्सिजन सपोर्टमा राखिएका ५० बर्षभन्दा बढी उमेरका दुई कोरोना संक्रमित विरामीलाई रेडियसन थेरापी दिइयो । उनीहरुको स्वास्थ्य अवस्थामा राम्रो प्रगति देखियो । अहिले उनीहरुलाइ अक्सिजन सपोर्टमा राख्नु परेको छैन ।’

डाक्टर डिएन शर्माका अनुसार आमरुपमा क्यान्सरका विरामीहरुको उपचारका लागि रेडियसन थेरापीको हाइ डोज दिइन्छ । तर कोरोना संक्रमित विरामीलाई कम डोज दिइएको थियो ।

डाक्टर शर्माका अनुसार यी दुवै विरामीमा रेडियसन थेरापीको कुनै नकरात्मक प्रभाव पनि देखिएन । यो प्रविधि बारे डाक्टर शर्मा भन्छन, ‘सन १९४० को दशकमा एन्टिबायोटिक औषधि थिएन । त्यसबेला न्युमोनियाको उपचारमा यहि रेडियसन थेरापीको प्रयोग गरिन्थ्यो ।’

यो पाइलट प्रोजेक्ट अन्तर्गत अन्य ८ जना कोरोना संक्रमित विरामीको उपचार यहि रेडियसन थेरापी प्रविधिबाट गरिनेछ ।

त्यसपछि प्राप्त नतिजाको विश्लेषण गरी ठोस निर्णय निकालिने एम्सको रेडिएशन अन्कोलोजी डिपार्टमेन्टका प्रमुख डाक्टर डिएन शर्मालाई उद्धृत गर्दै भारतीय संचार माध्ययम अमर उजालाले जनाएको छ ।