नेकपा स्थायी कमिटी बैठक केहिबेरमा बस्दै, प्रधानमन्त्रीको राजीनामा माग्ने प्रचण्ड-नेपालको तयारी

काठमाण्डौं: सत्तारुढ दल नेपाल कम्युनिष्ट पार्टी (नेकपा)को स्थायी कमिटीको बैठक आज बस्दैछ । प्रधानमन्त्रीको सरकारी निवास बालुवाटारमा बिहान ११ बजे बैठक बस्न लागेको हो ।

करिब ६ महिनापछि बस्न लागेको बैठकमा विवादित अमेरिकी सहयोग सम्बन्धी सम्झौता मिलेनियम च्यालेन्ज कर्पोरेशन (एमसीसी)का बारेमा छलफल हुने नेकपाले जनाएको छ ।

पटक-पटक विभिन्न बाहानामा स्थगित हुँदै आएको बैठकमा कमिटीका सदस्यहरुले खुलेर सवालजवाफ गर्ने योजना बनाएका छन् । यो बीचमा पार्टी र सरकारले खेलेको भूमिका, प्रधानमन्त्रीको विवादास्पद क्रियाकलाप, संवैधानिक र दलसँग सम्बन्धी अध्यादेश प्रकरण, नागरिकता विधेयकदेखि प्रधानमन्त्रीको राजीनामा समेत स्थायी कमिटीका सदस्यहरुले माग्ने योजना बनाएका छन् ।

स्थायी कमिटी सदस्यहरुले अहिले अहिलेकै अवस्थामा एमसीसी जस्ताको त्यस्तै पारित गर्न नहुने लिने तयारी समेत गरेका छन् ।

४५ सदस्य रहेको नेकपाको स्थायी कमिटीमा पुष्पकमद दाहाल ‘प्रचण्ड’ समूहका १७, माधवकुमार नेपाल समूहका १३ र प्रधानमन्त्री केपी शर्मा ओली समूहका १४ जना रहेका छन् । अर्थात अहिलेकै अवस्थाम एमसीसी पास गर्न हुँदैन भन्ने प्रचण्ड-नेपाल समूहको बहुमत छ ।

त्यस्तै सचिवालयमा अलपत्रमा परेका ओली समूहले जसरी पनि निर्णय गर्नुपर्ने बाध्यता रहेको छ । पार्टी विधानमा कम्तीमा १ सातामा एकपटक सचिवालय बैठक बस्ने व्यवस्था भए पनि जेठ १७ यता सचिवालयको बैठक बस्न सकेको छैन ।

प्रधानमन्त्री ओलीलाई एक पद छोड्ने गरि दवाव दिने, पार्टीको विधान लागू गराउन दवाव दिने नेपाल पक्षको तयारी छ । एमसीसीबारे पार्टीभित्र दुई धार स्पष्ट देखिएकाले यसलाई पार्टीभित्रबाट सर्वसम्मत गराउन प्रधानमन्त्री ओलीलाई गाह्रो हुने देखिएको छ । एमसीसी अनुमोदनको पक्षमा ओलीलगायतका पक्षधर नेता छन् भने पार्टी अध्यक्ष प्रचण्डलगायतका शीर्ष नेताहरु संशोधन गर्नुपर्ने अडानमा छन् ।