रुसका राष्ट्रपति पुटिन थप १२ बर्ष सत्तामा रहने

एजेन्सी । रुसका राष्ट्रपति भ्लादिमिर पुटिन थप दुई कार्यकाल शक्तिमा रहने पक्का भएको छ ।

पुटिनलाई लामो समयसम्म शक्तिमा राख्नेगरी बनाइएको नयाँ संवैधानिक व्यवस्थाको पक्षमा भारी मत परेकाले पुटिन सन २०३६ सम्म रुसको राष्ट्रपति पदमा कायम रहने निश्चित भएको हो ।

झण्डै एक हप्ता लामो मतदानपछि बिहीबार सार्वजनिक भएको नतिजाले पुटिनलाई थप शक्तिशाली बनाएको छ ।

नयाँ मतादेशले संविधान संशोधनको प्रस्तावलाई अनुमोदन गरेकाले रुसको संविधानमा केही संशोधन भएको छ ।

संविधान संशोधनसम्वन्धी प्रस्ताव राष्ट्रपति पुटिनले गत जनवरीमा ल्याएका थिए ।

मतदानबाट अनुमोदन भएको संविधानमा राष्ट्रपति पुटिनलाई थप दुई कार्यकाल शक्तिमै रहने व्यवस्था गरिएको छ ।

प्रत्येक कार्यकाल ६ वर्षको हुने भएकाले उनले अर्को १२ बर्ष रुसमा शासन गर्ने कानूनी बाटो खुलेको छ ।

राष्ट्रपति पुटिनको अहिलेको कार्यकाल आगामी सन् २०२४ मा सकिंदै थियो ।

तर संविधानको नयाँ व्यवस्थाले २०२४ देखि थप ६ वर्षे दुई कार्यकाल थपेकाले उनको कार्यकाल अब सन् २०३६ सम्म सुनिश्चत भएको छ ।

६७ वर्षिय पुटिनले रुसमा गत दुई दशकदेखि शासन गर्दै आइरहेका छन् ।