नेकपा स्थायी कमिटी बैठक मंगलबार सम्मका लागि स्थगित

काठमाडौंः सत्तारुढ नेपाल कम्युनिष्ट पार्टी नेकपाको प्रधानमन्त्री निवास बालुवाटारमा जारी स्थायी कमिटीको तेस्रो दिनको बैठक सकिएको छ।

पहिलो दिन अध्यक्षद्धय केपी शर्मा ओली र पुष्पकमल दाहाल प्रचण्डले धारणा राखेका थिए । त्यसपछि हिजो दोस्रो दिन १८ जना स्थायी कमिटी सदस्यले धारणा राखेका थिए । आज तेस्रो दिनको बैठकमा बाँकी रहेका २१ जना सदस्यहरुले आफ्नो धारणा बैठकमा राखेका छन् ।

बैठकपश्चात पार्टी  प्रवक्ता नारायणकाजी श्रेष्ठले अहिलेसम्म सीमा विवाद र नयाँ नक्साका विषयमा मात्रै छलफल भएको सञ्चारमाध्यमलाई जानकारी दिए ।

आजसम्म बोल्ने सदस्यहरुले नयाँ नक्सा सार्वजनिक गरेकोमा सरकारलाई धन्यवाद दिदै अब भारतले मिचेको भूभाग फिर्ता ल्याउनका लागि ठोस कुटनीतिक पहल गर्न सुझाब दिएका छन् ।

शुक्रबारको बैठकमा अनुपस्थित रहेका प्रधानमन्त्री केपी शर्मा ओली आज एकैछिन मात्र बैठकमा बसेर बाहिरिएका थिए ।स्थास्थ्यमा समस्या भएकाले बैठक अवधिभर बस्न नसकेको जानकारी प्राप्त भएको प्रवक्ता श्रेष्ठले जानकारी दिएका छन् ।

प्रवक्ता श्रेष्ठका अनुसार आगामी बैठकमा कोरोना रोकथाम तथा नियन्त्रणका लागि सरकारले गरेको कामकारबाहीको विषयमा छलफल हुनेछ। स्थगित अर्को बैठक असार १६ गते मंगलबार विहान ११ बजे पुनः बस्ने भएको छ ।