लमजुङमा पहिरो आतंक : २१ घर बगाँउदा ८ जना घाईते, ८० घरका करिब ४ सय परिवारलाई अन्यत्र सारियो

काठमण्डाैंः लमजुङको मर्स्याङ्दी गाउँपालिका-३ मा लगातार पहिरो जाँदा २१ घर बगाउनुको साथै ५९ घर उच्च जाखिममा परेका छन् । बुधबार दिउँसोदेखि परेको पानिले पहिरो जाँदा बुधबार दिउँसोसम्म १९ घर बगाएको छ । पहिरो निरन्तर जारी रहेकाले राति थप दुई घर बगाएको थियो ।

पहिरोले बिहीबार बिहानसम्म २१ घर पूर्णरुपमा बगाएको र अहिलेपनि पहिरो झरिरहेको स्थानीय कृष्ण थापाले जानकारी दिए । ८० घर परिवार रहेको सो गाउँमा अन्य ५९ घरपनि पहिरोका कारण उच्च जोखिममा रहेका छन् ।

मर्स्याङ्दी गाउँपालिका–३ का वडाध्यक्ष प्रेमबहादुर बस्नेतका अनुसार ८० घरका करिब ४ सय परिवारलाई अन्यत्र स्थानान्तरण गरिएको र उनीहरुलाई गाँसवासको व्यवस्था मिलाइएको उनले बताए  ।

पहिरोले देवबहादुर गोतामे, सतिश गोतामे, रञ्जना गोतामे, काली अधिकारी, बुद्धिमाया अछामी, बाबुराम अछामी, सन्दीप अछामी, सन्तबहादुर अछामीको घर बगाएको छ ।

यस्तै उत्सव गोतामे, अनिता गोतामे, आइतबहादुर गोतामे, मानबहादुर अछामी, हिरा गोतामे, सुशीला गोतामे, दीपेन्द्र मजाकोटी, सुनिता मजाकोटी, राजेश मजाकोटी, फुलमाया मजाकोटी, अतिमान गोतामेको घर पहिरोले बगाएको छ ।

पहिरो झरेपछि भाग्ने क्रममा आठजना घाइते भएका छन् । घाइते हुनेमा सृजना गोतामे, सुजन अछामी, कविता बस्याल, देवबहादुर सार्की, जमुना अधिकारी, फुललमाया मजाकोटी, नन्दकुमारी अछामी र मिलन अछामी रहेका छन् ।

घाइतेहरुमध्ये दुईजनाको लमजुङ सामुदायिक अस्पताल बेसीसहर र अन्यको खुदी स्वास्थ्य चौकीमा उपचार भइरहेको प्रहरीले जनाएको छ ।

मंगलबार पनि सोही स्थानमा पहिरो गएको थियो । मंगलबारको पहिरोले पुरिएका घरमा सामान झिक्दै गर्दा बुधबार बिहान पुनः गएको पहिरोमा परि आठ जना घाइते भएका थिए ।