मुलुकको व्यवस्था बदलिए पनि अवस्था बदलिएन : उपेन्द्र यादव

रूपन्देही, वैशाख १९ । जनता समाजवादी पार्टी (जसपा), नेपालका अध्यक्ष उपेन्द्र यादवले मुलुकमा व्यवस्था बदलिए पनि अवस्था यथावत् रहेको टिप्पणी गरेका छन्। उनले संघीय लोकतान्त्रिक गणतन्त्र आए पनि शासकीय वर्ग पुरानै भएकाले परिवर्तनको अनुभूति जनताले गर्न नसकेको बताए।

जसपा नेपाल, रुपन्देही एकता प्रथम जिल्ला अधिवेशनको उद्घाटन गर्दै यादवले वर्तमान संविधान शोषित–उत्पीडितको पक्षमा नभएको धारणा राखे। “हिजोका शासक आज पनि शासक छन्, केवल व्यवस्था बद्लिएर केही हुँदैन, शासन र सत्ता पनि बदलिनुपर्छ,” उनले भने।

पूर्व उपप्रधानमन्त्रीसमेत रहेका यादवले जनसंख्याको आधारमा समावेशी प्रतिनिधित्व हुनुपर्ने माग गर्दै महिलाहरू र दलितहरूको नाममात्रको सहभागिता रहेको आरोप लगाए। उनले दलित र महिलालाई सत्ता र निर्णय प्रक्रियाबाट पर धकेलिएको बताए।

यादवले मधेशमा न्यून बजेट दिइएको गुनासो गर्दै दक्षिणबाट विकास सुरु गरी उत्तरतर्फ विस्तार गर्नुपर्ने धारणा राखे। “हामीले आफूलाई वर्षौंसम्म शोषण गर्ने वर्गलाई फेरि–फेरि मतदान गरेर सत्तामा पुर्याइरहेका छौं, अब सचेत हुनुपर्छ,” उनले भने।

त्यस्तै, पार्टीका महासचिव तथा लुम्बिनी प्रदेश इञ्चार्ज रामकुमार शर्माले प्रदेश सरकारलाई कमजोर बनाइएको आरोप लगाए। संघीयता कार्यान्वयनप्रति वर्तमान सरकारले इमान्दारी नदेखाएको उनको भनाइ थियो। उनले संविधान संशोधन र पुनर्लेखन नभए आन्दोलनको तयारी गर्नुपर्ने चेतावनीसमेत दिए।

कार्यक्रममा पूर्व रक्षा राज्यमन्त्री रामवचन यादव, केन्द्रीय सदस्य सावित्रा विश्वकर्मा, वरिष्ठ नेता कैलाश गुरुङ, लुम्बिनी प्रदेश कार्यबाहक अध्यक्ष रामअवतार यादव, प्रदेश कोषाध्यक्ष एवं रोहिणी गाउँपालिकाका अध्यक्ष विद्या प्रसाद यादव लगायतले समेत मन्तव्य दिएका थिए।