गाजा, सिरियामा आक्रमणलाई ‘सुधार’ गर्न नेतान्याहुलाई ट्रम्पको निमन्त्रणा : ह्वाइट हाउस

वासिङ्टन, साउन ७ गते । अमेरिकी राष्ट्रपति डोनाल्ड ट्रम्पले गाजा र सिरियामा भइरहेको इजरायली हवाई आक्रमण नियन्त्रण गरी स्थितिमा सुधार ल्याउन इजरायली प्रधानमन्त्री बेन्जामिन नेतान्याहुलाई बोलाउनुभएको ह्वाइट हाउसलाई उदृत गर्दै सिएनएनले जनाएको छ ।

गत बिहीबार गाजाको क्याथोलिक चर्चमा भएको आक्रमणको प्रतिक्रिया स्वरूप ट्रम्पले नेतान्याहुलाई आफ्नो असन्तुष्टि व्यक्त गरी इजरायलले आक्रमणलाई गल्ती स्विकार गर्न बोलाउनुभएको जनाइएको छ । युद्धग्रस्त देशलाई स्थिर बनाउन काम गरिरहेको समयमा सिरियाको राजधानी दमास्कसमा भएको इजरायली हवाई आक्रमणबारे पनि ट्रम्पले छलफल गर्नु हुने ह्वाइट हाउसका प्रेस सचिव क्यारोलिन लेभिटले पत्रकारहरूलाई बताउनुभयो ।

घनिष्ठ सहयोगी भए पनि ट्रम्प र नेतान्याहुको आपसी अविश्वासका कारण सम्बन्ध जटिल बनेको सिएनएनले उल्लेख गरेको छ । इरानमा यस गर्मीको संयुक्त हवाई अभियानको समयमा उहाँहरूले नजिकबाट सहयोग गरे पनि उहाँहरूबीचको व्यक्तिगत गतिशीलता तनावपूर्ण रहेको छ ।

लेभिटले विदेशमन्त्री मार्को रुबियोको नेतृत्वमा सिरियामा भइरहेका कूटनीतिक प्रयासहरूतर्फ पनि सङ्केत गर्नुभयो । रुबियोले अमेरिकाले प्रतिबन्ध हटाउने र पूर्व विद्रोही नेता एवं सिरियाली राष्ट्रपति अहमद अल–सारालाई समर्थन दिएको समयमा तनाव कम गर्न काम गर्नुभएको थियो ।

ट्रम्पले नेतान्याहुको हालैको वासिङ्टन भ्रमणले गाजामा युद्धविरामको दिशामा प्रगति हुने आशा गर्नुभएको थियो । युद्धविराममा हमासले बन्धक बनाएका मानिसको रिहाइ र मानवीय सहायताको पहुँच विस्तार समावेश थियो । सम्झौता चाँडै हुँदैछ भन्ने ट्रम्पको बारम्बार दाबीका बावजुद कुनै पनि घोषणाबिना नेतान्याहुले अमेरिका छाड्नुभएको थियो ।

वार्तासँग परिचित स्रोतहरूलाई उद्धृत गर्दै सिएनएनले सबै पक्ष अझै पनि पछिल्लो युद्धविराम र बन्धक मुक्तिको प्रस्तावमा हमासको प्रतिक्रियाको प्रतीक्षामा रहेको बताएको छ । सोमबार एक विज्ञप्तिमा हमासले सम्झौतामा पुग्न ‘चौबीसै हाम्रो सबै प्रयास र ऊर्जा प्रयोग गरिरहेको’ बताएको छ ।

लेभिटले गाजा द्वन्द्वको बढ्दो सङ्ख्याका बारेमा ट्रम्प गहिरो चिन्तित रहनुभएको बताउनुभयो । “मध्यपूर्वमा धेरै लामो समयदेखि भइरहेको यो द्वन्द्वबारे राष्ट्रपतिको सन्देश निकै क्रूर बनेको छ, विशेष गरी हालैका दिनहरूमा, तपाईँले धेरै मानिसहरूको मृत्यु भएको रिपोर्ट देख्नुभएको छ । मलाई लाग्छ राष्ट्रपतिले त्यो कहिल्यै हेर्न मन पराउनुहुन्न । उहाँ हत्याको अन्त्य होस् भन्ने चाहनुहुन्छ”, उहाँले भन्नुभयो ।

उहाँले गाजामा मानवीय सहायता पुर्याउने ट्रम्पको प्रयासको पनि प्रशंसा गर्नुभयो । स्थानीय स्वास्थ्य मन्त्रालयको तथ्याङ्कअनुसार मे महिनाको अन्त्यदेखि गाजामा मानवीय राहत खोज्दै गर्दा एक हजारभन्दा बढी मानिसको मृत्यु भएको सिएनएनले जनाएको छ । हालै २५ देशका विदेशमन्त्रीहरूले यस क्षेत्रमा ‘ड्रिप फिडिङ’ सहायताका लागि इजरायलको आलोचना गरेका छन् । रासस/एएनआई