वैदेशिक रोजगारीका श्रमिकको स्वास्थ्य परीक्षण शुल्क बढाएर ९५०० रूपैयाँ, आजदेखि लागू

काठमाडौं, १० मंसिर । सरकारले वैदेशिक रोजगारीमा जाने श्रमिकको स्वास्थ्य परीक्षण शुल्क बढाएर ९ हजार ५ सय रुपैयाँ तोकेको छ ।

तत्कालीन श्रम, रोजगार तथा सामाजिक सुरक्षामन्त्री शरतसिंह भण्डारीले शुल्क बढाउने निर्णय गरेका थिए । त्यसअघि स्वास्थ्य व्यवसायीले वैदेशिक रोजगारीमा जाने श्रमिकबाट ६ हजार ५ सय रुपैयाँसम्म लिने गरेका थिए । तत्कालीन मन्त्री भण्डारीले ८ चैत २०८१ को मन्त्रीस्तरीय निर्णय गर्दै सबै परीक्षणको प्याकेजमा ९ हजार ५ सय रुपैयाँ कायम गरेका थिए । उनको निर्णय आजदेखि लागु भएको छ ।

स्वास्थ्य परीक्षण सेवा गुणस्तरीय बनाउन भन्दै सरकारले ३४ प्रकारका स्वास्थ्य परीक्षण अनिवार्य गर्ने र त्यसका लागि शुल्क बढाउने निर्णय गरेको थियो । सरकारले तत्कालीन समयमा शुल्क बढाउने निर्णय गरे पनि चौतर्फी विवादका कारण कार्यान्वयनमा ल्याउन सकेको थिएन । यतिबेला विभागीय मन्त्रीसमेत नभएको अवस्थामा स्वास्थ्य व्यवसायीहरूले उक्त बढेको शुल्क आजदेखि कार्यान्वयनमा ल्याएका छन् ।

नेपाल स्वास्थ्य व्यवसायी महासंघ र नेपाल मेडिकल व्यवसायी संघले संस्थामा आबद्ध व्यवसायीलाई पत्राचार गर्दै बढेको शुल्क कार्यान्वयन गर्न भनेका छन् । ३४ प्रकारका परीक्षण अनिवार्य रूपमा गर्नुपर्ने व्यवस्था गरिएको र त्यसका लागि ९ हजार ५ सय रुपैयाँ लिन संस्थाहरूले व्यवसायीलाई अनुरोध गरेका छन् । सबै स्वास्थ्य संस्था प्रविधिमैत्री (डिजिटलाइजेसन) बनाउने कार्य मन्त्रालयले निरन्तर गरिरहेको छ, महासंघले जनाएको छ ।