प्रधानमन्त्री कार्कीसँग भारतीय विदेश अतिरिक्त सचिव महावरको भेटवार्ता

काठमाडौं। प्रधानमन्त्री सुशीला कार्कीसँग भारत सरकारका विदेश मन्त्रालयका अतिरिक्त सचिव मुनु महावरले आज सिंहदरबारमा शिष्टाचार भेटवार्ता गरेका छन्। भेटवार्ताका क्रममा दुवै पक्षबीच द्विपक्षीय आपसी हितका विविध विषयहरूमा विस्तृत छलफल भएको प्रधानमन्त्रीको सचिवालयले जनाएको छ।

सचिवालयका अनुसार भेटवार्तामा नेपाल–भारत सम्बन्धलाई अझ सुदृढ बनाउने विषय, क्षेत्रीय सहकार्य, विकास सहकार्य, भौतिक पूर्वाधार, ऊर्जा तथा पारवहनलगायतका मुद्दामा विचार–विमर्श गरिएको थियो। दुवै पक्षले आपसी विश्वास, सद्भाव र सहकार्यलाई निरन्तरता दिने प्रतिबद्धता व्यक्त गरेको बताइएको छ।

प्रधानमन्त्री कार्कीले नेपालको विकास सहयोग, विद्युत् व्यापार, सिमानासम्बन्धी अवरोध हटाउने विषय, लगानी प्रवर्द्धन, र आपसी आर्थिक साझेदारी विस्तार गर्न नेपाल तयार रहेको बताएको स्रोतले जानकारी दिएको छ। भेटमा अतिरिक्त सचिव महावरले पनि भारतले नेपालको आर्थिक तथा भौतिक पूर्वाधार विकासमा सहकार्य जारी राख्ने प्रतिबद्धता दोहोर्‍याएका थिए।

भेटवार्तामा दुवै देशबीच उच्च–स्तरीय संवाद निरन्तर राख्ने, बाँकी रहेका विषयहरू मैत्रीपूर्ण रूपमा समाधान गर्ने तथा सीमापार व्यापार र पारवहन सहज बनाउन संयुक्त पहल अघि बढाउने सहमति भएको जनाइएको छ।