हाइकिङ गएका भारतीय राजदूत अचेतपछी सैनिक हेलिबाट उद्धार

काठमाडौँ । नेपालका लागि भारतीय राजदूत नवीन श्रीवास्तव शनिबार हाइकिङका क्रममा अचेत भएका छन् । उनी काठमाडौँको दक्षिणी भेगमा रहेको चम्पादेवी क्षेत्रमा हाइकिङ गएका बेला अचानक अचेत भएको बताइएको छ ।

प्रहरी उच्च स्रोतका अनुसार हाइकिङका क्रममा स्वास्थ्यमा समस्या देखिएपछि राजदूत श्रीवास्तव बेहोस भएका हुन् । घटनाको जानकारी पाएलगत्तै नेपाली सेना तथा सशस्त्र प्रहरीको उद्धार टोली घटनास्थलतर्फ परिचालन गरिएको थियो ।

प्रहरी स्रोतले दिएको जानकारीअनुसार राजदूत श्रीवास्तवलाई सैनिक हेलिकप्टरमार्फत काठमाडौँको ग्राण्डी अस्पतालमा ल्याएर उपचार भइरहेको बताइएको छ ।

राजदूतको स्वास्थ्य अवस्था र उपचारसम्बन्धी थप जानकारी आधिकारिक निकायबाट आउने अपेक्षा गरिएको छ ।