त्रिविवि परीक्षा नियन्त्रण कार्यालयद्वारा आधिकारिक फेसबुक पेज सञ्चालन

काठमाडौँ । त्रिभुवन विश्वविद्यालय अन्तर्गतको परीक्षा नियन्त्रण कार्यालय (पनिका) ले आधिकारिक फेसबुक पेज सञ्चालनमा ल्याएको छ । विद्यार्थी तथा सरोकारवालालाई परीक्षा सम्बन्धी सूचना सहज र छिटो रूपमा उपलब्ध गराउने उद्देश्यले ‘TU Office of the Controller of Examinations’ नामक फेसबुक पेज सुरु गरिएको पनिकाले जनाएको छ ।

परीक्षा नियन्त्रण कार्यालयका अनुसार नयाँ डिजिटल माध्यममार्फत परीक्षासम्बन्धी सूचना प्रवाहलाई थप प्रभावकारी, सरल र पहुँचयोग्य बनाउने लक्ष्य लिइएको छ । अब उक्त फेसबुक पेजमार्फत परीक्षा तालिका, आवेदनसम्बन्धी सूचना, परीक्षा केन्द्र, नतिजा प्रकाशन तथा अन्य महत्वपूर्ण जानकारी नियमित रूपमा सार्वजनिक गरिनेछ ।

परीक्षा नियन्त्रक प्रा. डा. लक्ष्मण पौडेल ले सामाजिक सञ्जालको बढ्दो प्रयोगलाई ध्यानमा राख्दै विद्यार्थीले सहज रूपमा सूचना प्राप्त गर्न सकून् भन्ने उद्देश्यले फेसबुक पेज सञ्चालनमा ल्याइएको जानकारी दिए । उनले विद्यार्थी तथा अभिभावकलाई आधिकारिक पेजमार्फत आउने सूचनामात्र विश्वास गर्न आग्रहसमेत गरेका छन् ।

पनिकाले पछिल्लो समय डिजिटल प्रणालीमार्फत सेवा विस्तार गर्ने प्रयासलाई तीव्र बनाउँदै आएको छ । फेसबुक पेज सञ्चालनसँगै परीक्षा सम्बन्धी जानकारी प्राप्त गर्न विद्यार्थीलाई थप सहज हुने अपेक्षा गरिएको छ ।