झापामा प्रहरीद्वारा ‘स्वीप अपरेसन’

भद्रपुर (झापा), ३ असारः जिल्ला प्रहरी कार्यालय झापाले जिल्लाका विभिन्न स्थानबाट ९२ जना लागुऔषध प्रयोगकर्ता तथा कारोबारीलाई नियन्त्रणमा लिएको छ । जिल्ला प्रहरी कार्यालय , लागुऔषध नियन्त्रण ब्यूरो शाखा कार्यालय काँकरभिट्टा तथा मातहतका कार्यालयबाट खटिएको विशेष टोलीले सोमबार र मङ्गलबार ‘स्वीप अपरेसन’ गरी उनीहरूलाई नियन्त्रणमा लिएको हो ।

जिल्लाका विभिन्न शङ्कास्पद स्थानमा सञ्चालित अपरेसनका क्रममा ७९ पुरुष र चार महिला गरी ८३ जना लागुऔषध सेवनकर्ता र नौ जना कारोबारीलाई नियन्त्रणमा लिइएको जिल्ला प्रहरी कार्यालय झापाले जनाएको छ । प्रहरीका अनुसार पक्राउ परेकाहरूको साथबाट प्लास्टिकबाहेक ३८ ग्राम ९१० मिलीग्राम खैरो हेरोइनजस्तो देखिने लिसाइलो पदार्थ र तीन ग्राम ९०० मिलीग्राम गाँजा बरामद गरिएको छ ।

जिल्ला प्रहरी कार्यालय झापाका सूचना अधिकारी एवं प्रहरी नायब उपरीक्षक रञ्जन अवाका अनुसार लागुऔषधसहित फेलापरेका मुख्य कारोबारीहरूमा दमक नगरपालिका–३ बस्ने २७ वर्षीय विकास भुजेल र भद्रपुर नगरपालिका–७ बस्ने ३० वर्षीया सरिता राजवंशी रहेका छन् । उनीहरूको साथबाट छ ग्राम ९० मिलीग्राम खैरो हेरोइन बरामद भएको छ । यस्तै, बिर्तामोड नगरपालिका–६ बस्ने १८ वर्षीय देवेन्द्र विकको साथबाट एक ग्राम ४२० मिलीग्राम र बिर्तामोड–३ घर भई हाल वडा नं ४ मा डेरा गरी बस्ने ३९ वर्षीय गणेशप्रसाद ओलीको साथबाट ३०० मिलीग्राम खैरो हेरोइन फेलापरेको छ ।

त्यसैगरी, प्रतिबन्धित गाँजा तीन ग्राम ९०० मिलीग्रामसहित बिर्तामोड नगरपालिका–४ बस्ने २६ वर्षीय चाल्स लिम्बू र वडा नं ३ बस्ने ३० वर्षीय उमेश राजवंशी पक्राउ परेका छन् । शिवसताक्षी नगरपालिका–७ चन्द्रडाँगीस्थित ‘एलेक्स’ भन्ने सुरज ढकालको घर कोठा खानतलासी गर्दा २० ग्राम ४१० मिलीग्राम खैरो हेरोइन बरामद भएको प्रहरीले जनाएको छ ।

चितवन भरतपुर महानगरपालिका–१४ बस्ने २४ वर्षीया सोनी खाती र मेचीनगर नगरपालिका–६ काँकरभिट्टा बस्ने ६० वर्षीया सीता राजवंशीको साथबाट १० ग्राम ७७० मिलीग्राम खैरो हेरोइनजस्तो देखिने लिसाइलो पदार्थ बरामद गरिएको छ ।

प्रहरी नायब उपरीक्षक अवाका अनुसार नियन्त्रणमा लिइएका नौ जनामाथि हिरासतमा राखी थप अनुसन्धान भइरहेको छ । नियन्त्रणमा लिइएका अन्य लागुऔषध सेवनकर्ताहरूलाई आवश्यक मनोपरामर्श सेवा प्रदान गरी अभिभावकको जिम्मा लगाउने तथा आवश्यकताअनुसार पुनःस्थापना केन्द्रमा पठाउने कार्यसमेत भइरहेको छ ।