मुख्यमन्त्री कँडेलविरुद्ध अविश्वासको प्रस्ताव पेश

कर्णाली, ३२ असारः कर्णाली प्रदेशका मुख्यमन्त्री यामलाल कँडेलविरुद्ध अविश्वासको प्रस्ताव पेश गरिएको छ ।

नेपाली कम्युनिष्ट पार्टी (नेकपा) का ११ र नेपाली कांग्रेसका पाँच गरी १६ प्रदेशसभा सदस्यहरुले संयुक्त रुपमा हस्ताक्षर गरी आज कर्णाली प्रदेशसभा सचिवालयमा अविश्वासको प्रस्ताव पेश गर्नुभएको हो । प्रदेशसभा सदस्यहरुले नेपालको संविधानको धारा १८८ को उपाधार ४ तथा कर्णाली प्रदेशसभा नियमावली २०८१ को नियम १५२ को उपनियम २ बमोजिम लिखितरुपमा अविश्वासको प्रस्ताव पेश गर्नुभएको कर्णाली प्रदेशसभामा नेकपाका नेता मङ्गलबहादुर शाहीले जानकारी दिनुभयो ।

अविश्वास प्रस्तावमा प्रदेशसभा सदस्यहरु मङ्गलबहादुर शाही, राजकुमार शर्मा, कृष्णबहादुर जिसी, उर्मिला विश्वकर्मा, कल्याणी खड्का, जुम्कीत लामा (कार्की), बीरबहादुर शाही, भीमप्रकाश शर्मा, महेन्द्र केसी, मिलन खड्का, रनसिंह परियार, हिक्मतबहादुर विष्ट, वेदराज सिंह, सुरेश अधिकारी, बिजया बुढा र कृष्णकुमार बिसीले हस्ताक्षर गर्नुभएको छ । उहाँहरुले नेपालको संविधानको धारा १८८ को उपधारा ५ बमोजिम कर्णाली प्रदेशका मुख्यमन्त्री पदका लागि कर्णाली प्रदेशसभा सदस्य जीवनबहादुर शाहीलाई प्रस्ताव गर्नुभएको छ ।

पेश गरिएको सूचना दर्ता गरी कर्णाली प्रदेशसभा नियमावली २०८१ को नियम १५२ को उपनियम ३ बमोजिम आवश्यक प्रक्रियाका लागि आगामी सभाको बैठकको कार्यसूचीमा समावेश गरी छलफल गराउने व्यवस्थाका लागि अनुरोध गरिएको नेता शाहीले बताउनुभयो । रासस