गगनले देउवालाई भने : वडा अधिवेशन उदघाटन गर्न आइदिनुस्

काठमाडौं, १ असोज । नेपाली कांग्रेसका सभापति गगन थापाले पूर्वसभापति शेरबहादुर देउवालाई पार्टीको १५औँ महाधिवेशन उद्घाटन गरिदिन आग्रह गरेका छन्।

बिहीबार केन्द्रीय समिति बैठकमा उनले वडा अधिवेशनको उद्घाटनका दिन देउवालाई उपस्थित भएर उद्घाटन गरिदिन आग्रह गरेका हुन्।

देउवाले अधिवेशनको उद्घाटन गरेमा आफूहरूका लागि सम्मानको विषय हुने उनको भनाइ छ। ‘पूर्वसभापति शेरबहादुर देउवालाई आग्रह गर्न चाहन्छु, अधिवेशनको दिनमा आएर उद्घाटन गरिदिनुहोस्। हाम्रा लागि त्यो सम्मानको विषय हुन्छ,’ उनले भने।

थापाले पछिल्लो समय आफूहरूबीच भएका भनाभन र आरोप–प्रत्यारोपलाई बिर्सेर अघि बढ्न आग्रह गरे। ‘यो बीचमा कहाँ कसले के भन्यो, कसो भन्यो, बिर्सिदिऔँ,’ उनले भने, ‘मेरो अनुरोध छ।’

थापाले महाधिवेशन उद्घाटनमा देउवालाई सहभागी गराउन आफूले प्रयास गर्ने पनि बताए। ‘महाधिवेशन उद्घाटनमा शेरबहादुर देउवा दाइलाई ल्याउने प्रयास गर्छु,’ उनले भने।

बिहीवार बसेको बैठकमा देउवा पक्षका ३५ जनाभन्दा बढी नेताहरूको उपस्थिति छ ।

सभापति थापाले आफू पार्टीको विधान, संविधान र विधिबाट निर्देशित भएको बताउँदै तोकिएको समयमा महाधिवेशन सम्पन्न हुने बताए ।

कांग्रेसको कार्यतालिकाअनुसार वडा अधिवेशन असोज ३ र ४ गते हुनेछ भने विभिन्न तहको अधिवेशन सम्पन्न गरी असोज १६ देखि १९ गतेसम्म केन्द्रीय महाधिवेशन गर्ने तयारी रहेको छ।