असोज १९, २०८३ सोमबार
October 5, 2026
युग खबर
२०८३ असोज १९, सोमबार
काठमाडौँ । प्रधान सेनापति अशोकराज सिग्देल बेलायती सेनाका चिफ अफ जनरल स्टाफ रोली वाल्करको निमन्त्रणामा बेलायत प्रस्थान गर्नुभएको छ।
नेपाली सेनाका अनुसार प्रधान सेनापति सिग्देल असोज २५ गतेसम्म बेलायत भ्रमणमा रहनुहुनेछ। भ्रमणका क्रममा उहाँले बेलायती सेनाका उच्च अधिकारीहरूसँग भेटवार्ता गर्नुका साथै नेपाल–बेलायतबीचको सैनिक सम्बन्ध, पारस्परिक सहयोग तथा सहकार्यका विषयमा छलफल गर्नुहुने कार्यक्रम रहेको छ।
नेपाल र बेलायतबीच लामो समयदेखि कायम रहेको सैनिक सम्बन्धलाई थप सुदृढ बनाउन प्रधान सेनापतिको भ्रमण महत्वपूर्ण हुने नेपाली सेनाले जनाएको छ। दुई देशका सेनाबीच तालिम, अनुभव आदानप्रदान, संयुक्त अभ्यास तथा विभिन्न क्षेत्रमा हुँदै आएको सहकार्यलाई थप प्रभावकारी बनाउने विषयमा समेत भ्रमणका क्रममा छलफल हुने अपेक्षा गरिएको छ।
नेपाली सेनाका अनुसार भ्रमणले सैनिक कूटनीतिमार्फत नेपालको परराष्ट्र नीतिमा योगदान पुर्याउने विश्वास गरिएको छ। प्रधान सेनापतिको बेलायत भ्रमणलाई नेपाल–बेलायतबीचको द्विपक्षीय सैनिक सम्बन्धलाई थप विस्तार गर्ने अवसरका रूपमा समेत हेरिएको छ।
प्रधान सेनापति सिग्देल विदेश भ्रमणमा रहनुभएका अवधिमा बलाधिकृत रथी प्रदीपजंग केसीले कायममुकायम प्रधान सेनापतिको जिम्मेवारी सम्हाल्नुहुनेछ।
नेपाली सेनाको नेतृत्वको नियमित जिम्मेवारी हस्तान्तरणअन्तर्गत बलाधिकृत रथी केसीले प्रधान सेनापति सिग्देल स्वदेश नफर्किएसम्म कायममुकायम प्रधान सेनापतिको जिम्मेवारी निर्वाह गर्नुहुनेछ।
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया