छठले सामाजिक सद्भाव, सहिष्णुता र राष्ट्रिय एकता बलियो बनाओस् : सभामुख अर्याल

काठमाडौं । प्रतिनिधिसभाका सभामुख डोलप्रसाद अर्यालले छठ पर्वले समाजमा आपसी प्रेम, सद्भाव, सहिष्णुता र एकताको भावना अभिवृद्धि गर्दै राष्ट्रिय एकता तथा सामाजिक सद्भावलाई थप मजबुत बनाउने विश्वास व्यक्त गरेका छन्।

छठ पर्व, २०८३ का अवसरमा शुभकामना सन्देश जारी गर्दै सभामुख अर्यालले स्वदेश तथा विदेशमा रहेका सम्पूर्ण नेपाली दाजुभाइ तथा दिदीबहिनीमा सुख, शान्ति, समृद्धि, सुस्वास्थ्य, दीर्घायु एवं निरन्तर प्रगतिको हार्दिक मंगलमय शुभकामना व्यक्त गरेका छन्।

तराई–मधेश क्षेत्रमा विशेष रूपमा मनाइने छठ पर्वमा अस्ताउँदो र उदाउँदो सूर्यलाई अर्घ्य दिई पूजा आराधना गर्ने परम्परा रहेको उल्लेख गर्दै उनले सूर्य, पृथ्वी र जलप्रतिको श्रद्धा र भक्तिले नेपालको मौलिक संस्कृति, परम्परा तथा रीतिरिवाजलाई जीवन्तता प्रदान गरेको बताएका छन्। पारिवारिक सुख, समृद्धि र मनोकामना पूरा हुने विश्वासका साथ श्रद्धापूर्वक मनाइने छठले सामाजिक विभेद र असमानता अन्त्य गर्दै राष्ट्रिय एकता र सामाजिक सद्भाव मजबुत बनाउने विश्वास उनले व्यक्त गरेका छन्।

सभामुख अर्यालले यस वर्ष भोटेकोशी बाढीलगायत प्राकृतिक विपद्बाट प्रभावित नागरिकको पीडा र कठिनाइलाई समेत आत्मसात् गर्नुपर्ने बताएका छन्। उनीहरूको पुनःस्थापना र जनजीवन सामान्य बनाउन राज्यका सबै निकाय तथा समुदायबीच सहयोग, सहकार्य र एकता आवश्यक रहेको उनको भनाइ छ।

नेपालको बहुजातीय, बहुभाषिक, बहुधार्मिक तथा बहुसांस्कृतिक पहिचानको संरक्षण गर्दै विविधताबीचको एकतालाई सुदृढ बनाउनु साझा दायित्व भएको उल्लेख गर्दै सभामुख अर्यालले जनताका आवाज र आवश्यकतालाई सम्बोधन गर्दै राष्ट्रिय एकता प्रवर्द्धन गर्न सङ्घीय संसद् प्रतिबद्ध रहेको बताएका छन्।

उनले छठ पर्वले सबैमा सामाजिक सद्भाव, सहिष्णुता र एकताको भावना अभिवृद्धि गर्दै समग्र मानव कल्याण र राष्ट्रिय एकताका लागि प्रेरणा प्रदान गरोस् भन्ने कामना गरेका छन्।