नेकपा फुटिसकेको छैन: उपप्रधानमन्त्री पोख्रेल

काठमाण्डौं: नेकपा ओली समूहका  सचिवालय सदस्य तथा उपप्रधानमन्त्री ईश्वर पोखरेलले नेकपा फुटिनसकेको दावा प्रस्तुत गरेका छन् ।

प्रेस सङ्गठन नेपाल सर्लाहीले आयोजना गरेको पत्रकार भेटघाट कार्यक्रममा उपप्रधानमन्त्री पोख्रेलले दावाका साथ सो कुरा बताएका हुन् ।

नेकपा सर्लाहीले सदरमुकाम मलङ्गवामा आयोजना गरेको सभालाई सम्बोधन गर्ने क्रममा उपप्रधानमन्त्री पोखरेलले  आफूहरुले वर्तमान राजनीतिक घटनाक्रम जनतालाई बुझाउन अभियान थालेको र पार्टी अझै एक भएको बताए ।

उनले तत्कालिन एमाले र माओवादीबीच एकताको शुरुवातको अवस्थाबाटै केही समस्या देखिएको र अहिले सो समस्या सतहीरुपमा मैदानमा देखा परेको दाबी गरे ।

केही नेताको व्यक्त्तिगत स्वार्थको कारण पार्टी एकतामा गम्भिर संकट परेको भन्दै पोखरेलले ति स्वार्थले पार्टीलाई दाउमा राखेर अगाडी बढ्न नसकिने उनले बताए ।

प्रधानमन्त्री केपी शर्मा ओलीले ताजा जनादेशमा जान प्रतिनिधिसभा विघटन गरेको जनाउँदै निर्वाचन आयोगले चुनावको तयारी थालिसकेकाले उपप्रधानमन्त्री पोख्रेलले पार्टी कानूनी रुपमा नफुटेको दाबी गरे । उनले आगामी बैशाखमा निर्वाचन भएरै छाड्ने बताए ।