काठमाडौंः सशस्त्र द्वन्द्वकालमा काभ्रेका अर्जुन लामाको हत्यामा संलग्न भएको आरोपमा सभामुख अग्नि सापकोटाविरुद्धको मुद्दा संवैधानिक इजलासको पेशी सूचीमा राखिएको छ ।
बुधबार पेशीमा चढाइएको मुद्धाको फैसला प्रधानन्यायाधीश राणा नेतृत्वको संवैधानिक इजलासमा दीपककुमार कार्की, मीरा खड्का, हरिकृष्ण कार्की र ईश्वरप्रसाद खतिवडा न्यायाधीशले गर्ने भनिएको छ ।
यसअघि पनि पटक पटक उक्त मुद्धा पेशीमा चढाइए पनि फैसला हुन सकेको छैन । यसअघि २०७८ वैशाख ८ मा पनि यो मुद्दा पेशीमा चढाइएको थियो, तर हेर्न नभ्याएपछि सुनुवाइ सरेको थियो ।
१६ वैशाख २०६२ मा अपहरणमा परेका लामालाई खाल्डो खनेर ज्युँदै पुरेको भन्दै उनकी पत्नी पूर्णिमायाले २०६४ सालमा सर्वाेच्च अदालतमा उजुरी दर्ता गरेकी थिइन् ।
तत्कालीन बाबुराम भट्टराई नेतृत्वको सरकारले सापकोटाविरुद्धको जाहरी तामेलीमा राखेको थियो । त्यसपछि पनि पुनः पूर्णिमाया न्याय माग्न सर्वोच्च गइन्।
तर, मुद्दा विचाराधीन रहेकै अवस्थामा सापकोटा सञ्चारमन्त्री बने । त्यसपछि कनकमणि दीक्षितलगायतले सर्वोच्चमा अदालतको अवहेलना मुद्दा दायर गरेका थिए ।
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया