एमाले धनकुटाको इन्चार्जमा राजेन्द्र राई

काठमाण्डौंः ‘म्यान अफ द इलेक्सन’ घोषित एमाले केन्द्रीय सदस्य राजेन्द्र राई एमाले धनकुटाको इन्चार्जमा मनोनीत हुनु भएको छ। धनकुटामा स्थानीय, प्रदेश र सङ्घीय चुनावमा सबै सिट दिलाएर चर्चामा आउनु भएका राई एमालेको १०औँ महाधिवेशनबाट केन्द्रीय सदस्यमा निर्वाचित हुनु भएको थियो।

एमालेको हिजो सम्पन्न केन्द्रीय समितिको बैठकले राईलाई इन्चार्जको जिम्मेवारी दिएको हो । २०७४ मा धनकुटा यस्तो जिल्ला बन्यो, जुन जिल्लामा एमाले बाहेक अन्य सबै पार्टी मिल्दा पनि कुनै स्थानीय तह जित्न सकेनन् । अर्थात् धनकुटामा एमालेले राजेन्द्र राईको नेतृत्वमा क्लिन स्वीप गर्‍यो । एमालेले क्लिन स्वीप गरेको एउटै मात्र जिल्ला धनकुटा हो।

राईलाई एमाले अध्यक्ष केपी शर्मा ओलीले नै ‘म्यान अफ द इलेक्सन’को उपाधि दिनुभएको थियो । २०६६ सालमा एमाले धनकुटाको अध्यक्ष निर्वाचित हुनुभएका राई लगातार दुई पटक जिल्लाको नेतृत्व गरिरहनुभएको छ । त्यसैगरि केन्द्रीय सदस्यहरू सकुन्तला बस्नेत र बिना राईलाई सह इन्चार्जको जिम्मेवारी दिइएको छ। संविधानसभा सदस्य टीकाराम चेम्जोङलाई एमालेको प्रदेश १ को प्रदेश कमिटी उपाध्यक्षको जिम्मेवारी दिइएको छ ।