कम्प्युटरमा यसरी खेल्नुहोस् पब्जी, फ्रिफायर जस्ता मोबाइल गेम

काठमाण्डौंः के तपाई पब्जी, फ्रिफायर, टेम्पल रन र क्यान्डी क्रसजस्ता गेम आफ्नो कम्प्युटरमा खेल्न चाहनुहुन्छ ? यदि चाहनुहुन्छ भने आज हामी कसरी यी र अझै धेरै मोबाइल गेमहरु आफ्नो कम्प्युटरमा खेल्न सकिन्छ भन्ने विषयमा जानकारी दिँदै छाैं ।

मोबाइल गेम कम्प्युटरमा खेल्नका लागि सबैभन्दा सहज तरिका भनेको इमुलेटर प्रयोग गर्नु हो । कम्प्युटरमा इमुलेटर इन्स्टल गरिसकेपछि यसले एन्ड्रोइड एपका लागि एन्ड्रोइड अपरेटिङ सिस्टमको जस्तो काम गर्छ, जसले गर्दा सजिलै साना गेमका साथै ठूला ठूला ब्याटल रोयल मोबाइल गेमहरु पनि डेस्कटप वा ल्यापटपमा खेल्न सकिन्छ ।

यसका साथै इमुलेटरमा गेमका लागि चाहिने सबै कन्ट्रोलहरु उपलब्ध गराइएको हुन्छ, जुन आफ्नो हिसाबले कस्टमाइज पनि गर्न सकिन्छ । यसबाहेक किबोर्ड र माउसबाट नै सबै कुरा कन्ट्रोल गर्न सकिने हुँदा ब्याटल रोयल गेमहरु कम्प्युटरमा खेल्दा ‘गेम प्ले’ पनि मोबाइलमा खेल्ने खेलाडीको तुलनामा राम्रो हुन्छ ।

अहिले अनलाइनमा धेरै इमुलेटरहरु उपलब्ध छन्, जसले गर्दा कुन आफ्नो कम्प्युटरमा इन्स्टल गर्ने भनेर तपाईँ द्विविधामा पर्न सक्नहुनेछ । यस्तो अवस्थामा यदि तपाईसँग पावरफुल कम्प्युटर छ र ठूला गेमहरु खेल्न चाहनुहुन्छ भने म ब्लुस्ट्याकइमुलेटर डाउनलोड गर्न सक्नुहुन्छ ।

तर तपाईँसँग अलि कम विशेषता भएको कम्प्युटर छ र तपाईँ समान्य एप चलाउन चाहनुहुन्छ भने तपाईँ नक्स इमुलेटर वा एलडी प्लेयर इन्स्टल गर्न सक्नुहुन्छ ।

इन्स्टल गरिसकेपछि तपाईँले प्ले स्टोरमा साइन इन गरेर आफूले चाहेको एप वा गेम इन्स्टल गरेर ठूलो स्क्रिनमा त्यसको मजा लिन सक्नुहुनेछ । गेमका लागि भने इमुलेटर अनुसारको कन्ट्रोल सेटिङहरु मिलाउनुपर्ने हुनसक्छ । इमुलेटर, गेम सेटिङ र कन्ट्रोल आफ्नो हिसाबले मिलाइसकेपछि गेमको मजा लिन सक्नुहुनेछ ।-टेकपाना