आइसोलेसनमा रहेका ३६ जना संक्रमितकै अवस्था सामान्य

काठमाडौं । स्वास्थ्य मन्त्रालयले हालसम्म कोरोना भाइरसको ५३ हजार ५ सय ३४ वटा कुल परीक्षण भएको जानकारी दिएको छ।

गत चौबीस घन्टामा २ हजार १ सय ८४ वटा परीक्षण भएको हो।

पिसिआरबाट १० हजार ४ सय ७१ जनाको कुल परीक्षण भएको हो भने र्‍यापिड टेस्टबाट ४३ हजार ६३ जनाको परीक्षण भएको हो।

स्वास्थ्य मन्त्रालयको नियमित ब्रिफिङका क्रममा प्रवक्ता डा। विकास देवकोटाले यसबारे जानकारी दिएका हुन्।

डा।देवकोटाले हालसम्म कोरोना संक्रमितको संख्या ५२ नै रहेको बताए। यसमध्ये १६ जना निको भएर घर फर्किसकेका छन्।

संक्रमितमध्ये हाल धनगढीमा एकजना, वीरगञ्जमा ३ जना, भरतपुरमा १ जना र विराटनगरमा ३१ जना गरी कुल ३६ जनाको उपचार भइरहेको छ।

साथै डा.देवकोटाका अनुसार संक्रमितहरुको स्वास्थ्य अवस्था सामान्य रहेको छ।

यस्तै हाल देशभर २० हजार १ सय ९५ जना क्वारेन्टाइनमा रहेको उनको भनाइ छ।

आइसोलेसनमा भने कुल १०६ जना रहेको जसमा उपत्यकाभित्र ८ जना र उपत्यका बाहिर ९८ जना रहेको उनले जानकारी दिएका छन।

उनले रेडजोनमा देशभर ३ सय ४ जना रहेको बताएका छन, जसमा गत चौबीस घन्टामा ८ जना रेड जोनमा परेका हुन्।

यस्तै प्रदेश नं १ सरकारले कोरोना भाइरस संक्रमित उपचारका लागि सुनसरीको वी पी कोइराला स्वास्थ्य विज्ञान प्रतिष्ठान धरानमा सय वेडको अस्पताल सञ्चालनमा ल्याएको छ। राप्ती स्वास्थ्य विज्ञान प्रतिष्ठानमा पनि पीसीआरबाट परीक्षण सुरु भएको छ। योसँगै देशभरि पीसीआर विधिबाट परीक्षण गर्ने प्रयोगशालाको संख्या १६ पुगेको छ।