संसदलाई कुनै एक पार्टीको मागमा बन्दी बनाउने हथकन्डा अपनाउन मिल्दैन – पूर्वसभामुख दमननाथ ढुङ्गाना (अन्तवार्ता)

अहिलेको संसद्को गतिरोधलाई कसरी हेरिरहनुभएको छ ?

हाम्रा पार्टीहरू कुन हदसम्म गैरजिम्मेवार बन्न सक्छन् भन्ने उदाहरण हो यो संसद्को अवरोध । संसद्मा प्रतिपक्षले दृष्टिकोण राख्न र मत नमिलेमा विरोध गर्न सक्छ । तर, देश र जनताका मुद्दामा बहस गर्नुपर्ने, नीति नियम बनाउनुपर्ने थलोलाई यसरी कुनै एक पार्टीको मागमा बन्दी बनाउने हथकन्डा अपनाउन मिल्दैन ।

प्रमुख प्रतिपक्षीले सुन तस्करीको छानबिन गर्न संसदीय समिति नै बनाउनुपर्ने अडान किन लिएको होला ?

संसदीय समितिले कुनै पनि विषयमा जाँचबुझ गरेर प्राप्त तथ्य र प्रमाणका आधारमा प्रतिवेदन तयार गर्ने हो । यस्तो समितिले कसैलाई मुद्दा चलाउन सक्दैन । उसले मुद्दा चलाउने कुनै आधार पनि हुँदैन । यस्तोमा प्रमुख प्रतिपक्षीले संसदीय समितिको माग गरेर संसद् चल्न नदिनु भनेको मुख्य ‘इस्यु’लाई ‘डाइभर्ट’ गर्ने दाउ पनि हुन सक्छ । आखिर यसअघिका कुनचाहिँ संसदीय समितिको प्रतिवेदन कार्यान्वयन भएको छ र ?

संसद्को अवरोध कसरी हटाउन सकिएला त ?

यसरी विनाकारण एउटा दलको अडानका कारण संसद् अवरुद्ध भइरहने हो भने दल र जनप्रतिनिधिहरूका जनतासितको सम्बन्ध कमजोर हुँदै जानेछ र उनीहरूप्रतिको जनविश्वासमा पनि कमी आउनेछ । अवरोध खुलाउने विषयमा सबैभन्दा मुख्य भूमिका सभामुखको हुन्छ । उहाँले कति पहल गर्नुहुन्छ, त्यसमा पनि भर पर्छ । अहिले एमाले जनमतको ‘ट्रायल’मा गइरहेको छ । अब बिस्तारै आन्तरिक र बाह्य जनमतको दबाब बढ्दै जाँदा ऊ अवरोध हटाउन बाध्य हुनेछ । नयाँपत्रिका