बाँकेमा १२ जना कोरोना सङ्क्रमित निको भई डिस्चार्ज

नेपालगञ्ज । बाँकेमा १३ जनाले कोरोनालाई जितेर घर फर्किएका छन्। नरैनापुरका १२ र नेपालगञ्जका एकजनाले कोरोनालाई जितेका हुन्। उनीहरु सबैलाई घर पठाइएको छ।

जिल्ला स्वास्थ्य कार्यालय, बाँकेका अधिकृत एवं कोरोनाका फोकलपर्सन नरेश श्रेष्ठले नेपालगञ्जको लायन्स डेन्टल अस्पतालमा राखिएका नरैनापुरका १२ जना र खजुरास्थित क्यान्सर अस्पतालको आइसोसेलन अस्पतालमा रहेका नेपालगञ्ज–८, जोलाहनपुरुवाका एकजना डिस्चार्ज भएको जानकारी दिएका छन।

डेन्टल अस्पतालबाट घर हिडेका नरैनापुरका १२ जनालाई नेपालगञ्जका मेयर डा. धवलशमशेर राणा, उपमेयर उमा थापामगर, लायन्सका सेम शाक्यले बिदाई गरेको नेपालगञ्ज उपमहानगरपालिकाका स्वास्थ्य शाखाका प्रमुख रामबहादुर चन्दले बताएका छन।

डेन्टलमा नरैनापुरका २३ जनालाई राखिएको थियो। त्यसमध्येमा १२ जना शुक्रबार घरतर्फ गएका छन्। सबै जनाको दोस्रो पटक कोरोना परीक्षण गरिएकोमा केहीको पोजिटिभ देखिएको थियो। घर पठाइएकाहरुको रिपोर्ट नेगेटिभ आएको थियो।

नरैनापुरका यी संक्रमितलाई नेपालगञ्ज ल्याउनका लागि सुरक्षाकर्मीलाई हम्मे–हम्मे परेको थियो। स्थानीयले अवरोध गरेका थिए भने संक्रमितहरु आउन मानेका थिए। सुरक्षाकर्मीले जबरजस्ती ल्याइएका उनीहरु शुक्रबार मुस्कुराउदै घरतर्फ लागेका छन्।

बाँकेमा २ सय ५५ जना संक्रमित भएकोमा ४२ जनाले कोरोनालाई जितेर घर फर्किसकेका छन्। कोरोना परीक्षणको दायरा बढाउदै जादा नयाँ नयाँ संक्रमित थपिदै गएका छन्। शुरुवाती चरणका संक्रमितहरु निको भएर घरतर्फ जाने क्रम पनि बढेको छ।