निर्मला हत्याका दोषीलाई साताभित्र कारबाही गर्ने गृहमन्त्रीको घोषणा

काठमाडौं । कञ्जनपुरकी १३ वर्षीया बालिकाको हत्या भएको दुई महिना भन्दा बढि भैसकेपनि उनको हत्यारा पत्ता लाग्न सकेको छैन । हत्यारा पत्ता नलागेपछि सरकारलाई दवाव दिन विभिन्न संघ संगठन सक्रिय भएका छन् ।

यसै क्रममा नेपाल कम्युनिष्ट पार्टी (नेकपा) निकट विद्यार्थी संगठनले पन्त हत्याकाण्डको सत्यतथ्य छानबिन गरी तत्काल दोषीमाथि कारवाही गर्न माग गरी गृहन्त्रीलाइ ज्ञापनपत्र बुझाएको छ ।

विद्यार्थीले बुझाएको ज्ञापनपत्र बुझ्दै गृहमन्त्री रामबहादुर थापाले एक साताभित्र कञ्चनपुरकीनिर्मला पन्तको बलात्कारपछि हत्यामा संलग्न दोषीलाई कारवाही गरिने प्रतिबद्धता व्यक्त गर्नुभएको छ ।

उहाँले पन्त हत्याकाण्डमा गठित छानबिन समितिको निष्कर्ष सार्वजनिक गरिने बताउनुभयो । अनेरास्ववियु र अनेरास्ववियु (क्रान्तिकारी)ले गृहमन्त्रीलाई ज्ञापनपत्र बुझाउँदै पन्त हत्यामा संलग्न दोषीलाई कडा कारवाही गर्न माग गरेका छन् ।

उनीहरूले पन्तको बलात्कार र हत्याका मूल कारक, बम दिदीबहिनी, कञ्चनपुरका प्रहरी उपरीक्षक र हत्यामा संलग्न अन्य प्रहरी अधिकारी (दसी प्रमाण मेट्ने) व्यक्तिमाथि पनि अनुसन्धान केन्द्रित गर्न माग गरेका छन् ।

ज्ञापनपत्रमा जनताको जीउधनको सुरक्षामा सिङ्गो संरचनालाई प्रभावकारी बनाउन असक्षम प्रहरी प्रमुखलाई तत्काल बर्खास्त गर्न पनि माग गरिएको छ । बलात्कार, तेजाब प्रहार र जघन्य अपराधमा आजीवन कारवाही गरिनुपर्नेमा उनीहरूले जोड दिएका छन् ।

त्यस्तै हालै बढाइएको यातायात भाडा फिर्ता गर्नुपर्ने, कालोबजारी, महँगी र बेथितिको नियन्त्रण तथा जनजीविकाका पक्षमा परिणाममुखी कदमका लागि जनतालक्षित राहत कार्यक्रम घोषणा गर्न पनि विद्यार्थी सङ्गठनले माग गरेका छन् ।