दसौँ राष्ट्रिय खेलकुदका लागि गण्डकी प्रदेशको तयारी सुरु

कास्की । कर्णाली प्रदेशमा आगामी मङ्सिरमा आयोजना हुने दसौँ राष्ट्रिय खेलकुद प्रतियोगिताका लागि गण्डकी प्रदेशले आवश्यक तयारी सुरु गरेको छ ।

राष्ट्रिय खेलकुदका लागि प्रदेश खेलकुद परिषद्ले गण्डकीका विभिन्न जिल्लामा तयारी अघि बढाएको हो । प्रतियोगिताका लागि स्थानीय तहदेखि प्रदेशस्तरसम्म खेलाडी छनोट गरिने छ ।

गण्डकी प्रदेश खेलकुद परिषद्ले प्रदेशका ११ वटै जिल्ला खेलकुद विकास समितिलाई पत्राचार गर्दै प्रतियोगिताका लागि आवश्यक खेलाडी छनोट प्रक्रिया अघि बढाउन निर्देशन दिएको छ । यसपटक राष्ट्रिय खेलकुदमा ३२ वटा खेल समावेश गरिएको छ ।

परिषद्का सदस्यसचिव श्रीधर शर्माका अनुसार राष्ट्रिय खेलकुदका लागि पालिकास्तरीय छनोट प्रतियोगितामार्फत खेलाडी छनोट गरिने छ । स्थानीयस्तरको छनोट प्रतियोगिता आगामी कात्तिक १० गतेभित्र सम्पन्न गर्नुपर्नेछ ।

त्यसैगरी, जिल्लास्तरीय छनोट कात्तिक १३ देखि १५ गतेसम्म र प्रदेशस्तरीय छनोट कात्तिक १६ देखि २० गतेसम्म सम्पन्न गर्नुपर्नेछ । “स्थानीय तहमा छनोट भएका खेलाडीबाट जिल्लास्तरीय प्रतियोगितामा सहभागिता गराउने र जिल्लाबाट छनोट भएका खेलाडीलाई प्रदेशस्तरीय प्रतियोगितामा सहभागी गराइनेछ । प्रदेशस्तरीय छनोटबाट राष्ट्रिय खेलकुद प्रतियोगितामा सहभागी हुने खेलाडी तथा टोली निर्धारण गर्ने छौँ,” सदस्य सचिव शर्माले भन्नुभयो ।

राष्ट्रिय प्रतियोगिताका लागि खेलाडी छनोट गर्दा निर्धारित मापदण्डअनुसार प्रक्रिया अघि बढाउन, आवश्यक तयारी गर्न तथा प्रतियोगिता व्यवस्थित रूपमा सञ्चालन गर्न परिषद्ले सम्बन्धित जिल्ला खेलकुद विकास समितिलाई आग्रह गरेको छ ।

परिषद्ले स्थानीय तह, जिल्ला खेलकुद विकास समिति तथा सम्बन्धित सरोकारवालाबीच समन्वय गरी निर्धारित समयभित्र छनोट कार्यक्रम सम्पन्न गर्न अनुरोध गरेको छ ।

दसौँ राष्ट्रिय राष्ट्रपति रनिङ शिल्ड प्रतियोगिता कर्णाली प्रदेशमा आगामी मङ्सिर १६ देखि २७ गतेसम्म आयोजना हुँदैछ । राष्ट्रिय खेलकुदमा गण्डकी प्रदेशको सहभागिता सुनिश्चित गर्न प्रदेशस्तरीय छनोट प्रक्रिया अघि बढाइएको परिषद्ले जनाएको छ ।

परिषद्ले खेलाडी छनोटलगायत गण्डकी प्रदेशको टोली निर्माणका लागि आवश्यक बजेटका लागि सामाजिक विकास युवा तथा खेलकुद मन्त्रालयमा अनुरोध गरेको छ ।

यसअघि गण्डकी प्रदेशको पोखरामा विसं २०७९ असोज २८ देखि कात्तिक ३ गतेसम्म नवौँ राष्ट्रिय खेलकुद प्रतियोगिता सञ्चालन भएको थियो । नवौँमा गण्डकी प्रदेश पहिलो हुन सफल भएको थियो ।

नवौँको समापनका अवसरमा दुई वर्षपछि कर्णालीमा १०औँ संस्करण गर्ने घोषणा गरिए पनि चार वर्षपछि बल्ल प्रतियोगिता हुन लागेको हो ।