इजरायली गोलाबारीमा १६ प्यालेस्टिनीको मृत्यु

गाजा। इजरायली सेनाले उत्तरी गाजा पट्टीका क्षेत्रमा बमबारी गर्दा १६ प्यालेस्टिनीको मृत्यु हुनुका साथै धेरै जना घाइते भएका छन्।

बेत लाहियाको अल खजान छिमेकमा विस्थापित मानिसहरूलाई आश्रय दिने आवासीय संरचनामा इजरायली बमबारीमा १५ प्यालेस्टिनी मारिएको र अरू घाइते भएका मेडिकल स्रोतले जनाएको छ। लगातार इजरायली हवाई आक्रमण, विस्फोटका कारण दर्जनौँ मृतक र घाइते अझै बेत लाहियामा भग्नावशेषमुनि दबिएका छन्।

यसैबीच, जबलिया अल नाजलाको हलिमा अल सादिया स्कुलको परिधिमा इजरायली ड्रोन आक्रमणमा दुई दिनअघि घाइते भएका प्यालेस्टिनीको मृत्यु भएको छ। इजरायली सेनाले अल सफ्तावीमा आवासीय संरचना र ब्लकहरूमा गोलाबारी तीव्र पारेको छ। जबलिया शिविरका साथै बेत लाहिया सहरमा विस्फोटका आवाज सुनिएको थियो।

बिहान सबेरै इजरायली सेनाका सशस्त्र गाडीहरू बेत लाहियाको पश्चिममा अल–साइमा क्षेत्रमा प्रवेश गरे र जबलिया शिविरको पश्चिममा रहेको अल–फखौरा स्कूलतर्फ अघि बढेको थियो।

चुनौतीपूर्ण मानवीय अवस्था र बासिन्दाहरूलाई विस्थापित गर्ने प्रयासका बीच सेनाले उत्तरी गाजा पट्टीको ३२औँ दिनका लागि आफ्नो घेराबन्दी जारी राखेको छ। एजेन्सी