अमेरिकाको न्युयोर्कमा हेलिकोप्टर दुर्घटना : तीन बालबालिकासहित ६ जनाको मृत्यु

काठमाण्डौः अमेरिकाको न्युयोर्क सिटीमा बिहीबार भएको हेलिकोप्टर दुर्घटनामा तीन बालबालिकासहित ६ जनाको मृत्यु भएको छ।

दिउँसो करिब ३ बजे हडसन नदीमा हेलिकोप्टर खस्दा सबै सवारको ज्यान गएको हो । मेयर एरिक एडम्सका अनुसार हेलिकोप्टर डाउनटाउन हेलिपोर्टबाट उडेर म्यानहट्टन स्काइलाइन हुँदै स्ट्याच्यु अफ लिबर्टीतर्फ फर्कँदै थियो । हेलिकोप्टर उडेको १८ मिनेटमै दुर्घटना भयो ।

सञ्चारमाध्यमका अनुसार दुर्घटनाग्रस्त हेलिकोप्टरमा स्पेनबाट आएका पर्यटक सवार थिए । भिडियो र प्रत्यक्षदर्शीअनुसार हेलिकोप्टर आकाशमै असन्तुलित भई टुक्रिन थालिएको र त्यसपछि नदीमा खसेको देखिएको छ ।

घटनाबारे अमेरिकी यातायात सुरक्षा बोर्डले अनुसन्धान सुरु गरेको छ । राष्ट्रपति डोनाल्ड ट्रम्पले दुर्घटनाप्रति दुःख व्यक्त गरेका छन् । एजेन्सी