रुसी आक्रमणमा युक्रेनमा सातजनाको मृत्यु

किभ, युक्रेन, असार १० गते । पूर्वी युक्रेनको ड्निप्रो सहरमा रूसी क्षेप्यास्त्र आक्रमणका कारण कम्तीमा सात जनाले ज्यान गुमाएका छन् भने धेरै नागरिक घाइते भएको युक्रेनी अधिकारीहरूले जानकारी दिएका छन् । घाइतेहरूमध्ये १० जना बालबालिका पनि रहेका छन्, जसको अवस्था गम्भीर रहेको बताइएको छ ।

यस घटनाको केही घण्टाअघि युक्रेनकै सुमी क्षेत्रमा भएको मानवविहीन हवाई यन्त्र ड्रोन आक्रमणमा पाँच वर्षका बालकको पनि निधन भएको थियो ।

राष्ट्रपति भोलोदिमिर जेलेन्स्की यसैबीच नेदरल्याण्डमा आयोजित सुरक्षा सम्मेलनमा सहभागी हुन पुग्नुभएको छ, जहाँ मित्र राष्ट्रका नेताहरूसँग रूसविरुद्ध थप प्रतिबन्ध तथा सहयोगबारे छलफल हुने अपेक्षा गरिएको छ ।

ड्निप्रोपेत्रोभ्स्क क्षेत्रीय उद्धार सेवाले सार्वजनिक गरेका तस्बिरहरूमा घाइते नागरिकहरूको उद्धार तथा उपचारको कार्य भइरहेको देखिन्छ । केही नागरिकहरू गम्भीर रूपमा घाइते भएको र तत्काल स्वास्थ्य सेवामा पठाइएको जानकारी आएको छ ।

युक्रेनका परराष्ट्रमन्त्री आन्द्रिय सिबीगाले भन्नुभयो,“जब विश्वका नेताहरू शान्ति र सुरक्षाको विषयमा छलफल गर्न भेला भइरहेका छन्, रूसले हिंसा र त्रास फैलाउने कार्यमार्फत शान्तिको प्रयासलाई अस्वीकार गरेको देखिन्छ । यो स्थितिमा मित्र राष्ट्रहरूले रूसमाथि थप दबाब दिनु समयको माग हो ।”

क्षेत्रीय प्रमुख सेर्गी लिसाकका अनुसार ड्निप्रोमा भएको आक्रमणमा सात जनाको मृत्यु हुनुका साथै नजिकैको सामर नामक बस्तीमा पनि दुई जनाले ज्यान गुमाएका छन् र नौ जना घाइते भएका छन् ।

ड्निप्रो नगरप्रमुख बोरिस फिलाटोभले यस घटनालाई अत्यन्त दुस्साहसी आक्रमणको संज्ञा दिँदै भन्नुभयो,“पूर्ण युद्ध सुरु भएयता ड्निप्रोमाथिको यो सबैभन्दा निर्लज्ज र क्रूर आक्रमणमध्ये एक हो ।”

रूसी सेनाले हाल ड्निप्रोपेत्रोभ्स्क क्षेत्रको सीमातर्फ आक्रमण तीव्र पारिरहेको छ, जहाँ अहिलेसम्म उनीहरूको उपस्थिति थिएन ।

आक्रमणबाट विद्यालय, स्वास्थ्य संस्था र यात्रुवाहक रेल सेवामा पनि क्षति पुगेको छ, जसले नागरिक जनजीवनमा थप पीडा थपेको छ ।

यसअघि, सुमी क्षेत्रमा भएको अर्को आक्रमणमा तीन जना सर्वसाधारणले ज्यान गुमाएका थिए । क्षेत्रीय प्रमुख ओलेग ग्रिगोरोवका अनुसार,“उनीहरू एउटै टोलमा बस्ने परिवारहरू थिए । रातको निद्रामा रहेका बेला यो आक्रमण भयो, जसले तिनीहरूको जीवन सधैंका लागि बदलियो ।” रासस/एएफपी