वीरगन्जमा मन्त्रीका घर ध्वस्त

वीरगन्ज । जेन–जी समूहले काठमाण्डौमा सोमबार गरेको आन्दोलनमा सरकारले बढी बल प्रयोग गरी १९ को मृत्यु भएको भन्दै वीरगन्जमा पनि त्यसको कडा विरोध भएको छ । मंगलबार यहाँ विरोधमा उत्रिएका आन्दोलनकारीले बिहानैदेखि नेपाल सरकार विरुद्ध कडा शैली प्रस्तुत गर्दै स्थानीय प्रशासनले लगाएको निशेधाज्ञा तोडेर चोक–चोकमा प्रदर्शन सुरु गरेका हुन् ।

वीरगन्जको आन्दोलनमा जेनजी उमेर समूह माथिको उमेर समूहका मानिस पनि ठूलो संख्यामा सहभागी भए । उनीहरुले स्थानीय प्रशासनले सोमबार साँझ ९ बजेबाट लगाएको निशेधाज्ञा तोड्दै मंगलबार बिहानैबाट आन्दोलनकारीले वीरगन्जको घण्टाघर चोक, माईस्थान चोक, लगायत मुख्य बजारका चोक–चोकमा टायर बालेका विरोध जनाए । उनीहरुलाई प्रहरीले सांकेतिक रुपमा प्रदर्शन कम गर्न दवाव दिएपछि झन आन्दोलनकारी प्रहरी र प्रहरी युनिटमाथि तोडफोड गर्दै आगजनीमा समेत उत्रिए । सो क्रममा सुरक्षाकर्मी र आन्दोलनकारीका बीच ठाउँठाउँमा झडप समेत भएको छ ।

आन्दोलनकारीको उग्र रुप भए पनि पर्सा प्रहरीले भने संयमता अपनाउँदा पर्सामा मानवीय क्षति मंगलबार हुनबाट जोगिएको प्रत्यक्षदर्शीले पनि बताए । झडपमा दर्जनौ सेल अश्रु ग्याँस र केही रबरका गोली चलेका छन् । झडपका क्रममा सुरक्षाकर्मी र आन्दोलनकारी दुवै तर्फ घाइते भएका छन् । घाइते पुग्ने वीरगन्जको नारायणी अस्पतालमा साँझसम्म कुल २० जना घाइते पुगेको अस्पतालका सूचना अधिकारी डा.उदयनारायण सिंहले बताए । घाइते हुनेहरुमा वीरगन्ज महानगरपालिकाका ३ जना नगर प्रहरी, १ जना नेपाल प्रहरी र बाँकी सर्वसाधारण रहेको उनको भनाइ छ ।

घाइते मध्ये एक जनाको टाउकोमा अलि गहिरो घाउ रहेको र बाँकीको अवस्था सामान्य रहेको डा.सिंहले विस्तृतमा बताए । घटनास्थल तैनाथ रेडक्रमकर्मीले घाइते हुना साथ ८ जनालाई उद्दार गरी फष्टहेड उपचार गरेर थप उपचारका लागि स्वास्थ्य संस्थामा पठाएको नेपाल रेडक्रस सोसाइटी पर्साका अधिकृत उमेश मिश्रले बताए ।

आन्दोलनकारी उग्र बन्दै निवर्तमान मन्त्रीहरु राजकुमार गुप्ता, अजय चौरसिया, प्रदीप यादव र वीरगन्ज महानगरपालिकाका नगरप्रमुख राजेशमान सिंहको नीजि घरमा प्रवेश गरी तोडफोड र आगजनी गर्न बाँकी राखेनन् । उनीहरुले वीरगन्जको नेपाल टेलिकमको शाखा कार्यालय, आन्तरिक राजश्व कार्यालय, नेकपा एमाले पर्साको पार्टी कार्यालयमा पनि तोडफोड र आगजनी गरी क्षति पु¥याएका छन् । नेपाली कांग्रेसको रानीघाट पुलपारी रहेको पार्टी कार्यालयमा पनि आन्दोलनकारी प्रवेश गरी तोडफोड र आगजनी गरेर क्षति पु¥याएका छन् ।

उनीहरु यतिमा मात्र सिमित नभई वीरगन्जको रानीघाटमा रहेको नेपाल प्रहरी चौकी, वीरगन्जको घण्टाघरमा रहेको प्रहरी चौकी तोडफोड र आगजनी गरी ध्वस्त बताएका छन् । आन्दोलनकारीले वीरगन्ज महानगरपालिका भित्र पसी त्यहाँ राखिएका आधादर्जन सवारी, टेलिकमका २ वटा सवारी लगायत सर्वसाधारण पनि दर्जन बढीं सवारी र मोटरसाइकल पनि तोडफोड गरी आगजनी गरिदिएको पर्सा प्रहरीले जनाएको छ ।

काठमाण्डौमा भएको धनजनको क्षतिपछि सोमबार साँझबाट नै आक्रोसित हुँदै प्रदर्शनकारी तोडफोड र आगजनीमा उत्रिए पछि स्थानीय प्रशासनले अवस्थालाई नियन्त्रणमा लिन सोमबार साँझ ९ बजेदेखि बिहान ९ बजेसम्मका लागि बजार क्षेत्रमा कफ्यू लगाएको थियो । बिहान फेरि अवस्था विग्रन थालेपछि ११ बजेबाट साँझ ६ बजेसम्म कफ्यूको अवधि बढाएको थियो । आन्दोलनकारीको प्रदर्शन र आगजनी स्थानीय प्रशासनले कफ्र्यू लगाएको समयमा नै भएको हो । राजधानी दैनिक