सिमरा क्षेत्रमा आज पनि जेनजी युवाको प्रदर्शन जारी

काठमाडौँ । बाराको सिमरा क्षेत्रमा आज पनि तनावबाट ग्रस्त अवस्थामै प्रदर्शन जारी छ। बुधबार नेकपा एमालेका कार्यकर्ता र जेनजी समूहबीच भएको झडपपछि उत्पन्न स्थिति आज पनि शान्त भएको छैन।

बुधबार दिनभर झडप, ढुंगा–मुढा र धपेडी चलेपछि जिल्ला प्रशासन कार्यालय बाराले कर्फ्यू आदेश जारी गर्दै स्थिति नियन्त्रणमा लिएको थियो। साँझ प्रहरी–प्रशासन र आन्दोलनरत युवाबीच सहमति भएपछि सडक सञ्चालनमा आए पनि आन्दोलन भने आज पुनः चर्किएको छ।

बिहिबार बिहान १० बजेदेखि जेनजी युवाहरू एमालेका नेता तथा कार्यकर्ताले कुटपिट गरेको आरोपित व्यक्तिहरूको तत्काल पक्राउ माग गर्दै सिमरा चोकमा टायर बालेर प्रदर्शन गरिरहेका छन्।

लगातारको प्रदर्शनका कारण सिमरा तथा आसपास क्षेत्रका सामुदायिक र निजी विद्यालयहरूको पठनपाठन बन्द गरिएको छ। स्थानीय बासिन्दा निरन्तर तनावग्रस्त वातावरणका कारण घरबाहिर निस्कनसमेत हिच्किचाइरहेका छन्।

प्रहरी प्रशासनले स्थिति नियन्त्रणमा लिन अतिरिक्त टोली परिचालन गरेको छ भने वार्ता र मध्यस्थताबाट विवाद समाधान गर्ने प्रयास जारी रहेको जनाएको छ।