सिरहाको दक्षिणी सीमा नाकामा ब्यापक कडाइ-शंकास्पद व्यक्तिमाथि उच्च निगरानी

काठमाण्डौं, १६ मंसिर  । सिरहा जिल्लामा सुरक्षात्मक सतर्कता उच्च बनाइएको छ। जिल्ला प्रशासन कार्यालय, सिरहाले मंगलबार सूचना जारी गर्दै नेपाल–भारत खुला सीमाबाट परिचय नखुलेका वा शंकास्पद व्यक्तिहरू अवैध रूपमा प्रवेश गर्न सक्ने जोखिम बढेकाले सबै सीमा नाकामा कडाइ गरिएको जानकारी दिएको हो।

जिल्लाभित्र शंकास्पद व्यक्ति प्रवेश गरेको अवस्थामा नजिकको सुरक्षा निकायमा खबर गर्न पनि प्रशासनले आग्रह गरेको छ । यस्तै, कुनै पनि परिचय नखुलेका व्यक्तिलाई घरमा बसोबास गर्न नदिन र कुनै कामकाजमा नलगाउन पनि प्रशासनले आग्रह गरेको छ ।

सुरक्षा स्रोतका अनुसार सीमामा सशस्त्र प्रहरी, नेपाल प्रहरी र स्थानीय प्रशासनबीच सहकार्य गरेर चेकपोस्ट र अस्थायी निगरानी बिन्दुहरू थपिएको छ। प्रशासनले जोखिम न्यूनीकरणका लागि नागरिकको सक्रिय सहयोग अनिवार्य रहेको बताएको छ।