जेनजी आन्दोलनको जनधन क्षतिबारे जाँचबुझ आयोगमा पूर्वगृहमन्त्री रमेश लेखकको बयान

काठमाडौं । नेपाली कांग्रेसका नेता तथा पूर्वगृहमन्त्री रमेश लेखकले भदौ २३ र २४ गते भएको जेनजी आन्दोलनका क्रममा भएको जनधनको क्षतिसम्बन्धी विषयमा जाँचबुझ आयोगमा बयान दिएका छन्।

सिंहदरबारस्थित जाँचबुझ आयोगको कार्यालयमा सोमबार मध्याह्न करिब १२ः३० बजे उपस्थित भएका लेखकले करिब साढे दुई घण्टा आयोगसँग बयान दिएका थिए। बयानपछि उनी करिब दिउँसो ३ बजे आयोगको कार्यालयबाट बाहिरिएका हुन्।

जेनजी आन्दोलन भएको समयमा लेखक गृहमन्त्रीको जिम्मेवारीमा रहेकाले आन्दोलनको पृष्ठभूमि, सुरक्षा व्यवस्था, सरकारी निर्णय प्रक्रिया तथा घटनाक्रमबारे आयोगले उनीसँग विस्तृत रूपमा जानकारी लिएको जनाइएको छ।

आयोगले यसअघि पुस १३ गते बयानका लागि उपस्थित हुन लेखकलाई पत्राचार गरेको भए पनि उनी एक दिन ढिला गरी आज आयोगमा पुगेका हुन्। आयोगले आन्दोलनका क्रममा भएको मानवीय तथा भौतिक क्षतिबारे सत्यतथ्य पत्ता लगाउने उद्देश्यले सरोकारवाला राजनीतिक नेतृत्व, प्रशासनिक अधिकारी र अन्य पक्षहरूसँग क्रमशः बयान लिँदै आएको छ।

यसैबीच, पूर्वगृहमन्त्री लेखकले आजै पत्रकार सम्मेलन आयोजना गरी जेनजी आन्दोलन र त्यससम्बन्धी विषयमा आफ्नो धारणा सार्वजनिक गर्ने जानकारी दिएका छन्।