निर्वाचनको तयारीबारे राष्ट्रपतिलाई प्रधानमन्त्रीको ब्रिफिङ

काठमाडौं । रामचन्द्र पौडेलसँग प्रधानमन्त्री सुशीला कार्कीले शिष्टाचार भेट गर्नुभएको छ।

बुधबार शीतल निवासमा भएको भेटमा समसामयिक राजनीतिक अवस्था तथा बिहीबार हुन गइरहेको प्रतिनिधिसभा सदस्य निर्वाचनबारे छलफल भएको राष्ट्रपति कार्यालय स्रोतले जनाएको छ।

भेटका क्रममा प्रधानमन्त्री कार्कीले निर्वाचनको तयारी, सुरक्षा व्यवस्था र प्रशासनिक व्यवस्थापनबारे राष्ट्रपतिलाई जानकारी गराउनुभएको थियो। देशभरि मतदान शान्तिपूर्ण र निष्पक्ष रूपमा सम्पन्न गराउन सरकारले आवश्यक सबै तयारी पूरा गरेको जानकारी प्रधानमन्त्रीले दिनुभएको बताइएको छ।

राष्ट्रपति पौडेलले निर्वाचनलाई लोकतान्त्रिक प्रक्रियाको महत्वपूर्ण चरणका रूपमा उल्लेख गर्दै शान्तिपूर्ण वातावरणमा सम्पन्न गर्न सम्बन्धित निकायलाई आवश्यक समन्वय र सतर्कता अपनाउन आग्रह गर्नुभएको स्रोतले जनाएको छ।

निर्वाचनको पूर्वसन्ध्यामा भएको यो भेटलाई राजनीतिक रूपमा महत्वपूर्ण मानिएको छ। सरकारले मतदातालाई निर्भय र उत्साहपूर्वक मतदानमा सहभागी हुन आह्वान गर्दै आएको छ।