सुर्खेतको हलकण्डरामा जिप दुर्घटना, १२ जना घाइते

सुर्खेत । सुर्खेतको लेकबेँसी नगरपालिका–५ र ६ को सिमानामा पर्ने हलकण्डरामा आज बिहान भएको जिप दुर्घटनामा १२ यात्रु घाइते भएका छन् ।

हलकण्डरा डाँडागाउँबाट दशरथपुरतर्फ जाँदै गरेको भे१ख ५४० नं को यात्रुबाहक मुस्ताङ जिप उकालोमा अनियन्त्रित भई सडकमा पल्टिएर दुर्घटना भएको हो ।

दुर्घटनामा घाइते भएकामध्ये लेकबेँसी नगरपालिका–६ सुर्खेतका २२ वर्षीया सुष्मा कार्की, ७० वर्षीया अमृता कार्की, २६ वर्षीया तिल्सरा सिरिस र ७० वर्षीया खगीसरा विकको अवस्था गम्भीर रहेको प्रहरीले जनाएको छ । चार जना यी बिरामीलाई उपचारका लागि माया नर्सिङ होम सुर्खेतमा पठाइएको छ ।

अन्य केही घाइतेको सोही नर्सिङ होममा र केही सामान्य घाइतेको भने स्थानीय मेडिकल दशरथपुरमा उपचार भइरहेको जनाइएको छ ।