रुसको ड्रोन आक्रमण तीव्र, अप्रिलमा नयाँ रेकर्ड

किएभ, वैशाख १८ गते । युक्रेनमाथि रुसले अप्रिल महिनामा लामो दूरीका आक्रमणकारी ड्रोनको अभूतपूर्व प्रयोग गर्दै नयाँ रेकर्ड कायम गरेको छ । किएभको वायु सेनाले सार्वजनिक गरेको तथ्याङ्कमा आधारित एएफपीको विश्लेषणले युद्धको स्वरूप अझ आक्रामक र व्यापक बन्दै गएको सङ्केत दिएको छ ।

प्रकाशित दैनिक विवरणको सङ्कलन अनुसार रुसले अप्रिलभरि कुल छ हजार ५८३ लामो दूरीका ड्रोन प्रक्षेपण गरेको छ । यो अघिल्लो महिनाको तुलनामा दुई प्रतिशतले बढी हो । मार्चमा समेत यसअघि कैयौँ ड्रोन प्रहार गरिँदा रेकर्ड बनेको थियो, तर अप्रिलले त्यो सीमा तोडेको छ । यसरी निरन्तर बढ्दो प्रयोगले मस्कोले हवाई आक्रमणको रणनीतिलाई थप तीव्र बनाउँदै लगेको देखिन्छ ।

युद्धको यस चरणमा एउटा उल्लेखनीय परिवर्तन भनेको दिनको समयमा पनि आक्रमण बढ्नु हो । पहिले प्रायः राति केन्द्रित रहने ड्रोन आक्रमण पछिल्ला हप्तामा दिन दहाडै हुन थालेका छन् । विश्लेषकले यसलाई नागरिक क्षेत्रमा बढी क्षति पुर्‍याउने उद्देश्यले अपनाइएको नयाँ रणनीति ठानेका छन् ।

युद्ध अध्ययन संस्थान (आइएसडब्लु) का अनुसार रात र दिन दुवै समयमा ठुलो परिमाणमा आक्रमण गर्नुले नागरिक सुरक्षामा गम्भीर असर पार्न सक्छ । विशेष गरी खुला क्षेत्र र सार्वजनिक स्थान लक्षित हुन सक्ने चेतावनी दिइएको छ, जहाँ मौसम तातिँदै जाँदा मानिसको उपस्थिति बढ्ने सम्भावना हुन्छ ।

युक्रेनी पक्षले भने आफ्नो प्रतिरक्षा क्षमतालाई सुदृढ रहेको दाबी गरेको छ । वायु सेनाको तथ्याङ्क अनुसार आएको कुल ड्रोन र मिसाइलमध्ये करिब ८८ प्रतिशत खसाल्न सफल भएको जनाइएको छ । किएभले आफ्नो हवाई सुरक्षा प्रणालीलाई विश्वकै प्रभावकारीमध्ये एकका रूपमा प्रस्तुत गर्दै आएको छ, जसले लामो समयदेखि भइरहेका रूसी आक्रमणलाई प्रतिरोध गर्दै आएको छ ।

युक्रेनका अधिकारीहरूले दिनको समयमा गरिने आक्रमणलाई ‘नागरिकलाई त्रसित पार्ने प्रयास’ का रूपमा व्याख्या गरेका छन् । राष्ट्रपति भोलोदिमर जेलेन्स्कीको कार्यालयका उपप्रमुख पावलो पालिसाका अनुसार यस्ता आक्रमणले केवल भौतिक क्षति मात्र नभई आर्थिक गतिविधिमा समेत गम्भीर अवरोध ल्याउँछ । “कार्य दिनकै बिचमा गरिने आक्रमणले व्यवसाय र दैनिक जीवनलाई पक्षाघात पार्ने प्रभाव पार्छ”, उहाँले एक अन्तर्वार्तामा बताउनुभएको थियो ।

यसअघि जाडो मौसममा रुसले युक्रेनको ऊर्जा संरचनालाई लक्षित गर्दै विद्युत् र ताप प्रणालीमा अवरोध पुर्‍याएको थियो, जसका कारण लाखौँ नागरिक चिसो मौसममा आधारभूत सेवाबाट वञ्चित भएका थिए । अहिले रणनीति परिवर्तन गर्दै आक्रमणको समय र स्वरूप दुवै विस्तार गरिएको देखिन्छ ।

मस्कोले भने नागरिकलाई लक्षित गरेको आरोप अस्वीकार गर्दै आफ्नो आक्रमण सैन्य तथा ऊर्जा पूर्वाधारमा केन्द्रित रहेको दाबी गर्दै आएको छ । यद्यपि, फेब्रुअरी २०२२ मा युद्ध सुरु भएयता हजारौँ सर्वसाधारणको ज्यान गइसकेको छ, जसमा आवासीय भवनमा भएका ड्रोन र मिसाइल आक्रमण पनि समावेश छन् ।

अमेरिकाको मध्यस्थतामा जारी वार्तासँगै आक्रमणको तीव्रता बढ्नुले द्वन्द्व समाधानको प्रयास थप जटिल बनेको सङ्केत दिएको छ । बढ्दो ड्रोन प्रयोग र नयाँ रणनीतिले आगामी दिनमा युद्धको दिशा अझ अस्थिर बन्ने देखिएको छ । रासस/एएफपी