रुसले युद्धविराम उल्लङ्घन गरेको युक्रेनको आरोप

किएभ, २३ वैशाख (रासस\एएफपी): रुसले युक्रेनले प्रस्ताव गरेको एकपक्षीय युद्धविरामलाई उल्लङ्घन गर्दै रातभरि ठूला स्तरका ड्रोन र क्षेप्यास्त्र आक्रमण गरेको युक्रेनी अधिकारीहरूले आरोप लगाएका छन् । किएभका अनुसार उक्त आक्रमणले शान्ति प्रयासलाई पुनः कमजोर बनाएको छ ।

युक्रेनी पक्षका अनुसार रुसले एकै रातमा १०८ वटा लडाकू ड्रोन र तीनवटा क्षेप्यास्त्र प्रहार गरेको थियो । युक्रेनले आह्वान गरेको युद्धविराम मे ६ को मध्यरातदेखि लागू हुने भनिए पनि मस्कोले त्यसलाई स्वीकार गरेको औपचारिक सङ्केत नदिएको बताइएको छ ।

राष्ट्रपति भोलोदिमर जेलेन्स्कीले केही दिनअघि रुसले मे ९ मा हुने विजय दिवस परेडलाई ध्यानमा राख्दै छोटो समयका लागि युद्धविराम घोषणा गरेको बताउनुभएको थियो । तर किएभका अनुसार पछिल्ला आक्रमणहरूले मस्कोको वास्तविक उद्देश्य शान्ति नभई सैन्य प्रदर्शनलाई प्राथमिकता दिने देखाएको छ ।

यसै सन्दर्भमा युक्रेनका विदेशमन्त्री एन्ड्री सिबिगाले सामाजिक सञ्जालमार्फत रुसको कदमको कडा आलोचना गर्दै मस्कोले शान्ति अस्वीकार गरेको र कथित युद्धविरामको आह्वान ‘कूटनीतिक नभई प्रचारात्मक’ मात्र भएको टिप्पणी गर्नुभयो । उहाँका अनुसार रुसले मानव जीवनभन्दा सैन्य प्रदर्शनलाई प्राथमिकता दिएको स्पष्ट देखिन्छ ।

यसअघि मङ्गलबार मात्र रुसले युक्रेनका विभिन्न सहरहरूमा ड्रोन, मिसाइल र बम आक्रमणको शृङ्खला चलाएको थियो, जसमा कम्तीमा २८ जनाको मृत्यु र दर्जनौँ घाइते भएको युक्रेनी पक्षले जनाएको छ । युक्रेनतर्फबाट गरिएको प्रतिआक्रमणमा भने क्रिमियामा पाँच जना र रुसको भित्री क्षेत्रमा लामो दूरीका ड्रोन आक्रमणमा दुई जनाको मृत्यु भएको बताइएको छ ।

फेब्रुअरी २०२२ मा रुसले पूर्ण आक्रमण सुरु गरेयता जारी युद्धले युरोपकै सबैभन्दा ठूलो द्वन्द्वको रूप लिएको छ । हालसम्म भएको वार्तामा उल्लेखनीय प्रगति हुन सकेको छैन ।

रुसले युक्रेनलाई पूर्वी क्षेत्रबाट सेना फिर्ता गर्न र पश्चिमी सैन्य सहयोग अस्वीकार गर्नुपर्ने माग राख्दै आएको छ, जसलाई किएभले आत्मसमर्पणसरहको शर्त भन्दै अस्वीकार गर्दै आएको छ ।

यसैबीच, रुसको रक्षा मन्त्रालयले राति २१ः०० देखि बिहान ०७ः०० (१८००–०४०० जिएमटी) बीच ५३ युक्रेनी ड्रोन खसालेको दाबी गरेको छ । यद्यपि किएभको युद्धविराम घोषणा लागू भएपछि ती घटनाहरू त्यससँग सम्बन्धित थिए वा थिएनन् भन्नेबारे मस्कोले स्पष्ट विवरण दिएको छैन ।