बरियारपट्टी छोटी भन्सार पुनःस्थापनाको माग गर्दै पूर्व–पश्चिम राजमार्ग अवरुद्ध

काठमाडौँ । सिरहाको बरियारपट्टीमा रहेको छोटी भन्सार कार्यालय पुनःस्थापनाको माग गर्दै स्थानीयवासीले पूर्व–पश्चिम राजमार्ग अवरुद्ध गरेका छन् ।

भन्सार कार्यालय नेपालको अन्तर्गतको सो भन्सार कार्यालय पुनः सञ्चालन गर्नुपर्ने माग राख्दै संघर्ष समितिले जिरोमाइल बजार क्षेत्रमा चक्काजामसहित विरोध प्रदर्शन गरेको हो ।

भन्सार पुनःस्थापना संघर्ष समितिका अनुसार कार्यालय बन्द हुँदा स्थानीय व्यापार, राजस्व संकलन तथा दैनिक आवतजावतमा गम्भीर असर परेको भन्दै सरकारलाई दबाब दिन आन्दोलन गरिएको हो । प्रदर्शनमा स्थानीय व्यापारी, सर्वसाधारण तथा समितिका सदस्यहरूको उल्लेख्य सहभागिता रहेको थियो ।

प्रदर्शनका कारण पूर्व–पश्चिम राजमार्गमा सवारी आवागमन प्रभावित भएको थियो भने सुरक्षाका लागि ठूलो संख्यामा सुरक्षाकर्मी परिचालन गरिएको प्रहरीले जनाएको छ । आन्दोलनकारीहरूले माग पूरा नभएसम्म आन्दोलन थप सशक्त बनाउने चेतावनी दिएका छन् ।