नारायणगढ-मुग्लिन सडक दुईतर्फी सञ्चालनमा

चितवन। पहिरोका कारण अवरुद्ध बनेको नारायणगढ-मुग्लिन सडक खण्ड दुईतर्फी रूपमा सञ्चालनमा आएको छ। बुधबार राति ९ बजे इच्छाकामना गाउँपालिका-५ स्थित तुइनखोलामा पहिरो खसेपछि सडकमा यातायात सेवा पूर्ण रूपमा ठप्प भएको थियो।

सडक डिभिजन कार्यालय भरतपुरका सडक सुपरभाइजर ईश्वर क्षेत्रीका अनुसार सडकमा जम्मा भएको पहिरो पन्छाएपछि अहिले यातायात सेवा पुनः दुईतर्फी रूपमा सञ्चालनमा आएको हो। पहिरो हटेसँगै रोकिराखेका सवारी साधनहरू आफ्नो गन्तव्यतर्फ लागेका छन्।

यस नारायणगढ-मुग्लिन सडक खण्डको तुइन खोला क्षेत्रमा लेदोसहितको पहिरो र ढुङ्गा खसिरहने समस्याका कारण यात्रुहरू लामो समयदेखि जोखिम मोलेर यात्रा गर्न बाध्य छन्। वर्षातको समयमा यो क्षेत्रमा यात्रा गर्दा विशेष सतर्कता अपनाउन सडक डिभिजन कार्यालयले आग्रह गरेको छ।