आजको मौसम : हिमाली र पहाडी भेगमा वर्षा र हिमपातको सम्भावना, तराईमा गर्मी बढ्ने

काठमाडौं। हाल नेपालको उपल्लो वायुमण्डलमा रहेको पश्चिमी न्यून चापीय रेखाका साथै स्थानीय र पूर्वीय वायुको समेत आंशिक प्रभाव रहेको छ।

यस मौसमी प्रणालीका कारण देशका हिमाली र पहाडी भू-भागका साथै गण्डकी र बागमती प्रदेशको तराई क्षेत्रमा साधारणतया बदली रहेको छ भने अन्य तराई भेगमा मौसम मुख्यतया सफा रहेको छ। अहिले बागमती, गण्डकी र लुम्बिनी प्रदेशका एक-दुई स्थानमा मध्यम वर्षा भइरहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ।

महाशाखाका अनुसार आज दिउँसो देशको हिमाली र पहाडी भू-भागमा साधारणतया बदली रहनेछ भने कोशी र मधेश प्रदेशका तराई भू-भागमा आंशिक बदली हुने देखिन्छ। बागमती, गण्डकी, लुम्बिनी र सुदूरपश्चिम प्रदेशका तराई भू-भागमा भने मौसम मुख्यतया सफा रहनेछ।

दिउँसो कोशी प्रदेशका हिमाली र पहाडी भू-भागका थोरै स्थानहरूमा तथा बागमती, गण्डकी, लुम्बिनी, कर्णाली र सुदूरपश्चिम प्रदेशका हिमाली तथा पहाडी भेगका एक-दुई स्थानमा मेघगर्जन र चट्याङ्गसहित मध्यम वर्षा तथा हिमपातको सम्भावना रहेको छ। यसैगरी, कोशी र मधेश प्रदेशको तराईका एक-दुई स्थानमा पनि मेघगर्जनसहित वर्षाको सम्भावना छ।

वर्षाको सम्भावनासँगै लुम्बिनी र सुदूरपश्चिम प्रदेशका तराई भू-भागका केही स्थानहरू तथा बागमती र गण्डकी प्रदेशका तराईका थोरै स्थानमा तातो हावा चल्ने र गर्मी बढ्ने सम्भावना पनि रहेको छ।

आज राति पनि कोशी, बागमती, गण्डकी, कर्णाली र सुदूरपश्चिम प्रदेशका हिमाली र पहाडी भू-भाग, लुम्बिनी प्रदेशको हिमाली क्षेत्रका साथै कोशी र मधेश प्रदेशका तराई भू-भागमा साधारणतया बदली रहने महाशाखाको पूर्वानुमान छ। लुम्बिनी प्रदेशको पहाडी भू-भागमा आंशिक बदली रहने भए पनि बागमती, गण्डकी, लुम्बिनी र सुदूरपश्चिम प्रदेशका तराई भू-भागमा रातिको मौसम मुख्यतया सफा रहनेछ।

रातिको समयमा कोशी प्रदेशका थोरै स्थान, गण्डकी प्रदेशका हिमाली र पहाडी भू-भागका थोरै स्थान तथा बागमती प्रदेशका हिमाली र पहाडी भेगका एक-दुई स्थानमा मेघगर्जन र चट्याङ्गसहित मध्यमसम्मको वर्षा र हिमपात हुन सक्नेछ। साथै कोशी प्रदेशको तराईका थोरै स्थानमा तथा मधेश प्रदेशका पनि एक-दुई स्थानमा मेघगर्जनसहित मध्यम वर्षाको सम्भावना रहेको भन्दै महाशाखाले आवश्यक सतर्कता अपनाउन अनुरोध गरेको छ।